Read Rongmei Naga KALUMLU 139 Bible Online

KALUMLU 139 - Rongmei Naga bible

KALUMLU 139

¹He RINGHPOUC, nang ata zauc mincna zauc e, kumna nang ata thay e.

²Ai taanc bammei kathuic hei nang thay e; alungning guay ta duh thangc rui nang thay e.

³Ai taanc bammei khatni nthaekc bammei guayna nang how e, ataanv guay nang thay e.

⁴Ai sa pat mak khou rui, ai sa pw nimei tei nang thay e.

⁵Nang hei athei ahu adaeng khou bam nkuay e; nang pumtan rui ata gaeklou e.

⁶Nang rui ata thaymei hei kanganv maek ge; mi hei ai thay tangh mak ge.

⁷Nang khou rui ai tabui thangc pak duak tat nina cho? Ai ley tat khang, nang bam makmei bamv nai cho?

⁸Ai tingpuk thangc ku sini, mi khou tei nang bam e; taruaih thangc key sini, mi khou tei nang bam e.

⁹Ai neihpat samc twan tat sini, khatni neihkey samc twan tat sini,

¹⁰ata zaylou khang, nang mi khou tei bam e; ata nkhavlou khang, nang mi khou tei bam e.

¹¹Ata zinghmei rui gumliamlou khang ai sw bam sini, akhou gaanclou bammei kalaanv ta zingbangc tiswlou bam sini,

¹²zinghmei tei nang khang zingh mak ge; zingbangc tei kalaanv kumc gaanc e. Nang khang zinghmei gaanhmei nchamc de.

¹³Nang rui apumc nanw guay damclou the; nang rui apui nacbamv khou rui ata duanc kariulou the.

¹⁴Ai nang ta thuanc e, kalam thu nang rui ata charynmei lwn khou damclou the! Mi hei ai nthanna thay e.

¹⁵Arou guay damhmei ganv khou tei, duanc kariu chuyna apui nacbamv khou duanc bam khou tei, meic thay meic how makmei khou daic thau bammei ganv khou tei, nang ata thay e.

¹⁶Ata puanc pat mak khou rui nang ata how the. Akhang tiiloumei tingmik guay tei, apanty tat thau mak khou rui, nang tuang latrik khou hylou the.

¹⁷He Ravguangc, nang lungning thay khang adih nthuk kan tu cho, mi guay tei adih geic kan tu cho, chak ngam thay lak ge!

¹⁸Ai mi guay tei chak ge thei, hei tei syniang suangc geic puni e. Ai zipthau pwkhou nganvna ai nang lev bam e.

¹⁹He Ravguangc, nang rui meicsimei ti hei swluailou e thei gay ni e! Zei miw zei haeng tikey bammei nunc akhou rui ducna tat kan o.

²⁰Kaniw nang ta sa kasicna sa e, kaniw nang zanc sa kasic e.

²¹He RINGHPOUC, nang ta karaengmei nunc ta ai adih karaeng cho! Nang ta liammei nunc ta ai adih karaeng cho!

²²Ai kaniw ta kanganv tangcna karaeng e; kaniw hei akhang zauczihmei e.

²³He Ravguangc, ata zauc mincna kathailou o, khatni alung hei thaylou o; ata nchanvna zauclou o, kumna alungning hei thaylou o.

²⁴Akhou simei nai bu ny zauc patlou o, kumna ata tingsaeng chaeng khou zaylou o.