Read Rongmei Naga KALUMLU 141 Bible Online

KALUMLU 141 - Rongmei Naga bible

KALUMLU 141

¹He RINGHPOUC, ai nang ta kaw e; ntaw ata nkhavlou o! Ai nang ta kaw pwkhou alat nkinglou o.

²Aravsuai hei agaw khou kumc, khatni abaanc zay thaumei hei tingzyn khaengmei kumc laalou o.

³He RINGHPOUC, amwang singaeklou o, abaley singaeklou o.

⁴Simei taanc nimei khou rui, khatni meicsimei nunc tuang simei taanv khou tei kazauh mak khang ata gaeklou o. Ai kaniw tuang khumngai khou kazauh mak kan diu.

⁵Meicgaymei rui ata nzianna bai kan diu khatni luh kan diu, tiki meicgay makmei nunc rui chakhwang swloumei ta laalou lak ge; kalam thu ai kaniw tuang simei taanv guay ta nuh makna huayney tanh tan bam e.

⁶Kaniw tuang dihsinpouc nunc ta khowtau khou phaickey pwkhou, alat guay hei nchumh e twmei meic nunc nuh puni.

⁷Thing kapakcna nchow pareiloumei kumc, kaniw rou ruc guay tei tarou mun khou nroulou o.

⁸Tiki, he RINGHPOUC aRacguangc, ai nang ta lwm bam e. Nang khou ai duplou e; ata theihmei khou rui kanlou o.

⁹Kaniw rui akhang zawloumei phac khou rui ata kanlou o, simei taanhmei nunc phac khou rui kanlou o.

¹⁰Ai kabiu kabaeng makna tat duakna, meicsimei nunc tei kaniw rana kaniw phac khou keylou kan diu.