Read Rongmei Naga KALUMLU 143 Bible Online

KALUMLU 143 - Rongmei Naga bible

KALUMLU 143

¹He RINGHPOUC, ai huayneymei chulou o! Nang thu nchumhmei e, kumna ai sa bammei hei nkinglou o; nang thu kalat suai makmeipu e, kumna ai huayneymei dawlou o.

²Nang bangc ata nchanvlou rio; nang mikzaw khou khuay maekmei gaanv khat na sini maek ge.

³Ata zauczihmei rui nthauna ata zaw tisilou the; kamei rui ata zinghmei kangkai khou lou the, ai hei reydouc rui theic kanmei kumc the.

⁴Kumna alung key reih rei the; aswang amav maek khe.

⁵Tat kanmei tingmik guay ta ai ningtow e; nang rui taanclou kanmei taanv guay ta makumh e, nang taanv guay ta ai ningtow e.

⁶Huayneyna ai nang khou abaanc zay thau e; phuimei kandic rui dui tari kumc abumaengc nang ta tari e.

⁷He RINGHPOUC, ntaw akhou dawlou o! Ai rigunmei guay maan ngam the. Nang zaw akhou rui nkamhlou rio, hamh e thei ai hei taruaih thangc key kanmei nunc tei kumc puni the.

⁸Taek makmei nang ramzian tei lauthwan kathuic akhou tiningtowlou o, kalam thu ai nang khou lwmlou e. Ai tat nimei chaeng akhou lyanlou o, ai nang khou huayney e.

⁹He RINGHPOUC, gaeklou khang ai nang khou guang e; ata zauczihmei nunc khou rui ata kanlou o.

¹⁰Nang hei aRacguangc e; nang ningmei taanh khang ata nchamlou o. Akhou gayna swlou o, khatni kabiu kabaeng lakmei chaeng khou zaylou o.

¹¹He RINGHPOUC, nang latdyng thei layna ata kanduaklou o, nang ramzian paan rui ryanramei guay khou rui ata kanlou o!

¹²Nang ata nzianmei paan rui ata zauczihmei nunc ta swluailou o, khatni ata rai bammei nunc ta swmutlou o, kalam thu ai hei nang bangc e.