Read Rongmei Naga KALUMLU 144 Bible Online

KALUMLU 144 - Rongmei Naga bible

KALUMLU 144

¹Ata gaekloumeipu RINGHPOUC ta thuanc o! Kamei rui ata rihsw thay khang nchamlou e, khatni rihngam khang pumtan tiilou e.

²Kamei hei ata gaekloumeipu khatni dinggaekloumeipu e, ai duppui bamv khatni ata kanloumeipu e, ai kakhou duplou e. Kamei rui zaatc nunc ta abangc khou nym keylou e.

³He RINGHPOUC, nang rui heidi kadan bammei maansei hei tabui tina cho?

⁴Maansei panty hei meic thiu na kumh tuang de, karingcting hei tat ruan patmei meicswng na kumh tuang de.

⁵He RINGHPOUC, tingpuk siatra patna keylou o; chyngbut guay ta kahilou o, kum pwkhou mi khou tei maikhou bun pat puni.

⁶Tingpalikmei riw phian patlouna, nang ta zauczihmei nunc ta alay phaklou o; nang tuang saucpai lu kaap patna, kaniw ta nthau ganclou o.

⁷Kauh thangc rui nang baanc haamv keylou o; nthukmei dui khou rui ata zay patlou o; kumna ata kan duaklou o; gin nunc pumtan khou rui ata kanlou o.

⁸Nchumhmei sa zat makmei nunc, syangdyng swlou sini saraamhmei nunc khou rui kanlou o.

⁹He RINGHPOUC, ai nang khou lu thanh suanlou ni; ai nrah zayna nang khou suanlou ni.

¹⁰Nang rui guangh nunc khou rihngammei tiilou the, khatni nang bangc David ta kanduaklou the.

¹¹Meic nzimei zauczihmei nunc khou rui ata kanlou o; gin nunc pumtan khou rui ata kanduaklou o, nchumhmei sa zat makmei khatni syangdyng swlouna saraamhmei nunc khou rui kanlou o.

¹²Aniu nac mpouh nunc hei kaniw chabwan ganv khou kathau gaymei thing bang nunc kumc kan diu. Aniw nac aluh nunc hei guanghkai kaikwn khou lou khang karuhloumei tiangc nunc tei kumc kan diu.

¹³Aniw saamc hei kazaat kathuic tuang phunling rui padik diu. Aniw ramvpuk khou bammei lauziu nunc hei kanac ching ching puanc diu.

¹⁴Aniw kiruai guay hei nzou makna khatni maan makna kingckiucna chapat diu. Ryanrana kauhmei khwan aniw tuang chaengdai guay khou chu mak kan diu.

¹⁵Mi kumcna lungc bammei zaat tei sangaymei zaat re; RINGHPOUC ta kaRacguangc swpuimei nunc tei sangay changhmei nunc e.