Read Rongmei Naga KALUMLU 146 Bible Online

KALUMLU 146 - Rongmei Naga bible

KALUMLU 146

¹RINGHPOUC ta thuanc o! RINGHPOUC ta thuanc o, he abumaengc!

²Ai ringh saanv thuanc ni; apanty nai saanv Ravguangc khou suan ni.

³Kapy swmei maansei nunc khou nang lwmlou rio; maansei gaanv khat na rui sini nang ta kanlou ngam mak ge.

⁴Kaniw theic pwkhou, kaniw taniang guanh dat kan the. Mi nungc tei rui kaniw taanh khang raengcloumei guay luai kan the.

⁵Zaenggay changhpui mei kiu Jakob Racguangc rui kata nkhavloupui mei, kachwn guay kaRacguangc khou ngangvloupui mei tei e,

⁶RINGHPOUC kaRacguangc hei, tingkauh, kandih, duipui khatni mi lungc khou bammei katana ta damcloumeipu, kamei hei lwmnuhmei e tingsaengzaeng.

⁷Rai riu khaengvmei nunc khang kamei rui latzan swlou e, khatni ndaapcmei nunc khang taektw tiilou e. RINGHPOUC rui kang bammei nunc ta ric patlou e,

⁸khatni mik tiatmei ta tihowlou e. Bow bammei nunc ta kamei rui zay thaulou e; ravchaptatmei nunc ta kamei nzian e.

⁹Aniu kandic khou bammei gin nunc ta kamei rui gaeklou e; kamei rui maypui nunc khatni nruna nunc ta nkhavlou e, tiki meicgay makmei nunc raeng guay swkamut kamailou e.

¹⁰RINGHPOUC hei tingsaeng guangh e. He Zaion, nang Racguangc tingsaeng guanghtu bam puni. RINGHPOUC ta thuanc o!