Read Rongmei Naga KALUMLU 147 Bible Online

KALUMLU 147 - Rongmei Naga bible

KALUMLU 147

¹RINGHPOUC ta thuanc o! Aniu Racguangc ta thuancna suanmei hei gay e, khatni thuanc nimei thouc e.

²RINGHPOUC rui Jerusalem ta kasiamh thaulou dat re: meic bangc bam tat kanmei nunc ta phungc guanglou dat re.

³Kalung bakmei nunc ta kamei rui tigaylou e, khatni kaniw zam guay duamlou e.

⁴Kamei rui gaanchuangcna sing dinglou e, khatni kazanc khat khat phuaklou e.

⁵Aniu RINGHPOUC hei daihmei khatni pumtan daihmei e; kaningting hei kanganv maek ge.

⁶Kamei rui niamhmei nunc ta zay thaulou e, tiki meicgay makmei nunc ta kandih khou niak piaklou e.

⁷RINGHPOUC ta thuanhpui lu suan o; aniu Racguangc khou nrah dow o.

⁸Kamei rui tingpuk ruc khou muangh chingclou e; kandih khang ting tiriulou e, khatni chyngbut guay khou mphuaih tithaulou e.

⁹Kamei rui khouringh nunc khang kataek tiilou e, khatni rah bammei agaekc nunc ta titulou e.

¹⁰Kamei neihlamei kiu tanhmei takuanc nunc khou hamh e; khatni kamei kahawmei kiu bauhmei rihmei nunc ta hamh e.

¹¹Tiki kata pingmei nunc ta kamei neihla e, taek makmei karamzian khou lwmloumei nunc ta neihla e.

¹²RINGHPOUC ta thuanc o, He Jerusalem! Nang Racguangc ta thuanc o, he Zaion!

¹³Kamei rui nang raengckat guay titanclou e; kamei rui nang mei nunc ta suaihiamlou e.

¹⁴Kamei rui nang tuang ramvrei guay khou latlu tinailou mak ge, khatni gaymei gehu rui nang ta ti-ngulou e.

¹⁵Kamei rui kandih ta latdanv tii e, khatni kamei rui samei tei kaneih makna taanc e.

¹⁶Kamei rui gunh phey kumc bamc patlou e, khatni gunh mbut kumc zin patlou e.

¹⁷Kamei rui nrihthai tausiamc kumc nrou key e, kamei rui tii guangmei nchumei ta meic gaanv khat na sini khaengv ngam mak ge!

¹⁸Khoutei kamei rui latdanv tii e, kumna gunh tei nungc e. Kamei rui mpwan tiguang e kumna dui luangc e.

¹⁹Kamei rui kamei nunc khou kalat tiilou e, kalatdanv Isaraelmei nunc khou tiilou e.

²⁰Kamei rui mi hei zaatc baihmei nunc khang taanclou mak ge, zaatc baihmei nunc katuang latdanv guay thay mak ge. RINGHPOUC ta thuanc o!