Read Rongmei Naga KALUMLU 148 Bible Online

KALUMLU 148 - Rongmei Naga bible

KALUMLU 148

¹RINGHPOUC ta thuanc o! He kauh karuc thangc bammeithiu, tingkauh thangc rui RINGHPOUC ta thuanc o.

²He kabaancharathiu, katuang tingkauh ricmeithiu, kata thuanc o!

³He bw neih, kata thuanc o! He gaanc bammei gaanchuangcna guay, kata thuanc o!

⁴He kauh liangmei tingpuk, khatni tingpuk ruc khou naimei guay, kata thuanc o!

⁵Mi guay hei rui RINGHPOUC zanc thuanc kan diu! Kalatdanv rui mi guay hei damclou tuang e;

⁶kalatdanv rui mi guay ti hei kabamv kabamv khou tingsaeng khang duanclou the, kumna kaniw piu mak ngam mak ge.

⁷He duipui ravsic nunc khatni duipui syng guay, kandih khou rui RINGHPOUC ta thuanc o!

⁸Tingpalikmei lev nrihthai, gunh khatni muangh guay, kalatdanv piumei mpwan guay, kata thuanc o!

⁹He luanghbut guay khatni chyngbut guay, tingthai bang guay khatni ngouh guay, kata thuanc o!

¹⁰He khouringh guay, kai khouringc khatni nwm khouringc guay, tuicna tatmei khatni nruayna guay, kata thuanc o!

¹¹He guangh nunc khatni zaatc nunc, guangh nac nunc khatni dihsinpouc nunc;

¹²tunac nunc khatni nggaanv nunc, gaanvthaih nunc khatni alauc nunc, kata thuanc o!

¹³Mi guay rui RINGHPOUC zanc thuanc kan diu! Kazanc hei ramh guayna khang suangc daic e; kahym hei tingpuk kandih suangc kauh e.

¹⁴Kamei rui nzianmei Isaraelmei nunc rui kata thuanh khang kamei rui kaniw khou pumtan tiilou the. RINGHPOUC ta thuanc o!