Read Rongmei Naga KALUMLU 17 Bible Online

KALUMLU 17 - Rongmei Naga bible

KALUMLU 17

¹He RINGHPOUC, nchumhmei latzan swlou khang ai rui huay bammei hei chulou o; nkhavlou khang ai rui kauc bammei hei nkinglou o! Kalingmei lat tei sa bammei hei chulou o.

²Nang rui akhang latzan swlou puni, kalam thu nchumhmei nang thay e.

³Nang alung ta kathai the, nang ata zingbangc guang zauc the, tiki akhou simei phu pat mak ge. Kalam thu amwang rui paapc sw mak khang alung ding the.

⁴Maansei nunc taanv lam khou— nang latdanv piupui paan rui abay adapmei nunc chaeng khou ai tat mak ge.

⁵Ai nang chaeng khou tat tanh tan e, mi khou tei rui ai tat mbiangh zat mak ge.

⁶He Ravguangc, ai nang khou huay e, kalam thu ai neymei nang rui dawlou puni; nang nu beic guanglouna alat guay hei nkinglou o.

⁷Nang tuang charynmei ramzian lyanlouna aniw ta kanlou o; nang daeng khou bamna aniw ta zauczihmei nunc khou rui duak the.

⁸Nang miknac ta kumcna ata gaeklou o; ata nang swkaeng lym khou nkamhlou o.

⁹Meicsimei nunc rui adow guang nimei khou rui, swluai khang ata bam haengv bammei nunc khou rui, nang swkaeng bangc khou tiduplou o.

¹⁰Kaniw khou zauzian maek ge khatni daic tuh tuna sa e.

¹¹Ntaw thu kaniw rui ata bam haengv the, ata sw khang mik kakhip makna mating bam the.

¹²Kaniw kamangliangpui kumcna ata nchwan bam e, ata siat puat paruatlou khang nchwan bam e.

¹³Guanglou o, he RINGHPOUC! ata zauczihmei nunc ta akhangvlou o, kaniw ta ngamlou o! Meicsimei nunc khou rui ata nang baengsaeng rui kanlou o.

¹⁴Kaniw dam mi kandic khou rui laa tangmei, kandih maansei nunc khou rui ata kanlou o. Nang rui kaniw khang lou kaduai bammei ryanramei dam tei rui kaniw ta dandi tiilou o; mi dandi tei kaniw nac nunc khang na hamhna, kaniw tou tak khang nganvna keylou kan diu!

¹⁵Tiki ai nang zaw how puni, kalam thu ai nkhuaimei taanv taanclou mak ge; kumna ai zipthau pwkhou, nang ta howna ai neihlamei padik puni.