Read Rongmei Naga KALUMLU 18 Bible Online

KALUMLU 18 - Rongmei Naga bible

KALUMLU 18

¹Nang ta nzian e, he RINGHPOUC, nang hei apumtan e!

²RINGHPOUC hei akhang taudaic e; kamei hei akhang tanhmei rihgaekkai e. ARacguangc hei akhang taudaic e, kakhou duplouna ai duak ge. Kamei rui ata nggih swna gaeklou e; kamei rui ata ding gaeklou e; kumna ai giuga makna bam e.

³Ai RINGHPOUC ta kaw pwkhou, kamei rui ata zauczihmei guay khou rui kanlou e. RINGHPOUC ta thuanc o!

⁴Swluai swtiat nuhmei rui ata bam haengv khwan the; swmaan nimei dui muat aruc khou thum liam khwan the.

⁵Theic nuhmei rui adaeng bam haengv khwan the, khatni tarou rui akhang phah zawlou khwan the.

⁶Ai ryanramei khou rui RINGHPOUC ta kaw khwan e; nkhavlou khang ai Ravguangc ta kaw khwan e. Katuang ravkai khou rui kamei akhwan chulou the; nkhavlou khang ai rui kapna huaymei kamei nkinglou the.

⁷Khoutei kandih kadunh the khatni kanukc the; chyngbut guay bamv kanukc the khatni kadunh the. Kalam thu Ravguangc kalungpuamc the.

⁸Kanukwang khou rui maikhou, kamwang khou rui raw mutmei mai bwang, khatni maithyn haenghmei mphiu pat the.

⁹Kamei tingpuk siat ra patna zinghmei muangc bangv khou dingna key the.

¹⁰Kamei kerubim khou tuangcna samc the; kamei mpwan swkaeng khou rui tat kalw the.

¹¹Kamei rui kata zinghmei rui gumliamlou the, dui phungc padikmei muangc bangv zingh zingmei rui kata gumliamlou the.

¹²Kahu khou rui palik patmei riw rui muangh bangv zinghmei ta siatra patna nrihthai khatni ganh key the.

¹³Khoutei RINGHPOUC tingpuk thangc rui, tingthinc ganh key the, kumna Kauh Liangsingmeipu khwan chu the.

¹⁴Kamei katuang pailu kaap pat the, kumna kata zauczihmei nunc ta alay phaklou the; tingpalikmei riw rui kamei rui kaniw ta hac ganc the.

¹⁵He RINGHPOUC, nang rui nang ta zauczihmei nunc ta mphut pwkhou, lunghpuamcna kaniw ta nin pwkhou, duipui bamv ti-nsalou the kandih bamv laanc patlou the.

¹⁶RINGHPOUC rui kauh thangc rui haamv keyna ata chakit the, kamei rui ata nthukmei dui khou rui zay patlou the.

¹⁷Ata zauczihmei tanhmei nunc khou rui, akhang suangc tanhmei ata karaengmei nunc khou rui, kamei rui ata guduaklou the.

¹⁸Ai ryanrapui ganv khou, kaniw ata adow khwan e, tiki RINGHPOUC rui ata gaeklou the.

¹⁹Kamei rui ata theic suc nuhmei khou rui kanlou the, kalam thu kamei ata kwnlou the.

²⁰RINGHPOUC rui akhang ai nchumhna lunghmei swan tiilou e; kamei rui ata suaihiamlou e, kalam thu akhuay maek ge.

²¹Ai Ravguangc latdanv piu the; ai aRacguangc khou rui karih nthei tat mak ge.

²²Kalatdanv guay ngaek ge; ai kalatdanv guay piu e.

²³Ai hei khuay maekmei e, ai nkhuaimei taanh makmei e twmei kamei thay e.

²⁴Kumna kamei rui akhang ai nchumhna lunghmei swan tiilou e, ai hei khuay maekmei e twmei kamei thay e.

²⁵He RINGHPOUC, nang hei lat piu chuymei nunc khou kalat suai zat makmeipu e, nthanmei nunc khang gay nthuih thiakmeipu e.

²⁶Nthanmei nunc khang nang hei nthanmei e, meicsimei nunc ta zauczihmeipu e.

²⁷Niamhmei nunc ta kanlou e; tiki daihriw swmei nunc ta nang rui ti-ana keylou e.

²⁸He RINGHPOUC, nang rui akhang gaanhmei tiilou e; nang rui akhou zinghmei laa ganclou e.

²⁹Ata zauczihmei nunc ta adow khang, kaniw tuang rihgaekkai ta ngam khang, nang rui akhang pumtan tiilou e.

³⁰Ravguangc thu kataanv guay nthuih e, kalat guay suai zat mak ge, kakhou duploumei guay ta nggih kumc gaeklou e.

³¹RINGHPOUC kamei na hei Ravguangc e; Ravguangc na hei aniu ta gaekloumeipu e.

³²Kamei hei akhang pumtan tiiloumeipu, achaeng khou kabiu kabaeng nimei guay laa gancloumei Racguangc e.

³³Kamei rui atan ta asanh tan kumc ti-magaplou e, kamei rui ata giuga makna chyngbut ruc khou tibamlou e.

³⁴Kamei rui ata rih adow ngam khang nchamlou e, ntanh saucpai sin ngam khang tiilou e.

³⁵He RINGHPOUC, nang rui ata gaeklou the khatni kanlou the; nang rui makavloumei paan rui ata tidaiclou the, khatni nang pumtan rui ata kanduaklou the.

³⁶Ata nym tow mak khang nang rui ata kanduaklou the kumna ai bow key zat mak ge.

³⁷Ai rui ata zauczihmei nunc ta nthauna nym the; kaniw ta swmutlou mak saanv ai nthaekc mak ge.

³⁸Ai rui kaniw ta siauc key the, kaniw thau dat ngam mak khe; kaniw ngam makna ahu khou zip bam the.

³⁹Nang rui akhang rih khang pumtan tiilou the, kumna ata zauczihmei nunc ta tingamlou the.

⁴⁰Nang rui ata zauczihmei nunc ta akhou rui tipaklou the; ata karaengmei nunc ta ai rui swmutlou the.

⁴¹Kaniw ta nkhavlou khang kaniw kauc khwan e, tiki gaanv khat na rui sini kaniw ta kanlou mak khe; kaniw RINGHPOUC ta kaw e, tiki kamei dawlou mak ge.

⁴²Ai rui kaniw ta mpwan rui hunc katungh bammei mbut baih the. Chaengluang khou mbut ta kumc ai rui kaniw ta niibin the.

⁴³Meicngam meicliammei nunc khou rui nang rui ata kanlou the, kumna zaatc nunc ruc khou ata kaipouc tiswlou the, khatni meic thaymakmei zaat nunc tei amei nunc sw the;

⁴⁴kandih baih thangc mei nunc ahu khou nkhum key the, kaniw alat chu pwkhou hei tei piu the.

⁴⁵Kaniw bau maek khe, kaniw rihgaekkai khou rui kadunhna pat the.

⁴⁶RINGHPOUC ringc bam e! Ata ding gaekloumeipu ta thuanc o! Ata kanloumei Racguangc hym kauc ndauh o!

⁴⁷Kamei rui ata rih tingamlou the; kamei rui zaatc nunc ta abangc khou nym keylou the,

⁴⁸ata howmumei nunc khou rui kanlou the. He RINGHPOUC, nang rui ata, zauczihmei nunc ruc khou rih tingamlou the, khatni swluai swtiat nimei nunc baanc khou rui ata kanlou the.

⁴⁹Mi zaeng rui ai nang ta zaatc nunc ding khou thuanc e; ai nang ta thuancna suan e.

⁵⁰Ravguangc kamei rui suangloumei guangc ta rihdai mpeyna tingamlou the; kamei rui thauh teyloumei David khatni kakikta ta, kamei rui tingsaeng nzianlou the.