Read Rongmei Naga KALUMLU 19 Bible Online

KALUMLU 19 - Rongmei Naga bible

KALUMLU 19

¹Tingpuk rui Ravguangc hym nthanna ndauh e! Mi khou hei kabaansyam nthanna lyanlou e!

²Tingmik kathuic sa bam e; zingbangc kathuic dinc bam e.

³Kakhwan maek ge, kalat maek ge; kakhwan meic chu mak ge.

⁴Tiki kaniw lat kandih pwm kagaengv lik ge; kandih tin tou chu tangc e. Ravguangc rui tingpuk khou neihmik khang kabamv kasiamhlou e.

⁵Neihmik hei neihlamei nowpouc kumc, lauluangc pak khang neihlana patmeipu kumc, lauthwan pat re.

⁶Tingpuk tin akhat khou rui patna, katin khat thangc kaan key kan e; neihthiu khou rui ramhkhat na sini nkamh ngam mak ge.

⁷RINGHPOUC latdanv hei nthuih e, mi rui pumtan kathanc tii e. RINGHPOUC latdanv guay hei lwmnuhmei e, mi rui mpangmei khang ningting tii e.

⁸RINGHPOUC latdyn guay hei nchumhmei e, mi hei rui meic lung tineihlalou e. RINGHPOUC latdyn guay hei kaling e, mi rui mik tiraklou e.

⁹RINGHPOUC ta kalummei hei gay e; meic nunc rui kata kalum bam puni. RINGHPOUC latzan guay hei nzih e; kaganv kathuicna khou gay e.

¹⁰Mi ti hei kunghmei kachaekc ta suangc kahaw e; mi hei nkhuaihdui nthanmei suangc ndeih e.

¹¹Mi hei rui nang bangc ata nchamlou e, mi guay hei piumei nunc khang swan daicna nai e.

¹²Thay makna taancloumei kakhuay ta thow thay ngam cho? Ai thay makmei khuay guay tei kuaklou o.

¹³Thayna paapc taanh mak khang ata gaeklou o; hei tei rui ata tingamlou rio. Kum pwkhou ai nthuih puni; twan lyammei khuay guay khou rui duak puni.

¹⁴He RINGHPOUC, ataudaic, ata kanloumeipu, alungning khatni alatsav guay hei nang mikzaw khou laalou nuhmei sw diu!