Read Rongmei Naga KALUMLU 22 Bible Online

KALUMLU 22 - Rongmei Naga bible

KALUMLU 22

¹ARacguangc, aRacguangc, tabui swna nang ata mpatlou tu cho? Nkhavlou khang kalanghna ai huay bammei khou rui tabui swna nang hei saanv duc bam tu cho?

²Zingbangc kalaanv huay bam e, tiki nang dawlou mak ge; ata zaeng ti-nthaekclou mak ge.

³Tiki nang thu nthanmeipu swna, Isarael rui thuanhmeipu swna, guangh bamvpaeng khou dungc bam e.

⁴Aniw pupouc nunc nang ta lwm e, kaniw nang ta lwm e, kumna nang rui kaniw ta kanpatlou e.

⁵Kaniw nang ta kaw khwan e, kumna kanduaklou khwan e; kaniw nang ta lwm e, kumna tizaklou mak ge.

⁶Tiki ai thu maansei hamh the, kuchiat kumhmei di the, meic kathuic rui karaeng the.

⁷Ata howmei guay ata sinnui the; kaniw chy malecna kaniw py kazinh the.

⁸Kaniw rui sa e, “Nang RINGHPOUC khou ngangvlou the. Tabui swna kamei nang ta kanlou mak bam tu cho? RINGHPOUC rui nang ta nzian e thei, tabui swna kamei nang ta nkhavlou mak tu cho?”

⁹Ata ramh sw ramh daengv makna puancloumei hei nang rui e, khatni apui pamv khou puanc nouc bam khou rui, nang rui kan duaklou the.

¹⁰Ata puanclou nungc tei rui, ai nang khou ngangvlou the, kumna nang hei aRacguangc sw tanh tan guang the.

¹¹Akhou rui duc tatlou rio! Ryanramei adaeng khou nai e, nkhavlou nimei maek ge.

¹²Guaichic pang rui, Bashan tuang tanhmei guaichic pang rui, ata bamv haengv the.

¹³Kataek phuna rah bammei kamangliangpui kumc, kaniw mwang hah pat the.

¹⁴Apumtan guay mbut khou dui bunlou kumc maek khe. Aryan aruc kabamv khou bam mak kumc the; alung khuailiu nungh kumc nungc kan the.

¹⁵Aruak mbut phui kumc phui the, abaley kalung dat ngam mak khe. Theihmei ta kumc, nang rui ata kandih khou ganclou the.

¹⁶Meicgay makmei kang rui adaeng bam haengv the; si pang kumc kaniw ata kwam guang the. Kaniw rui aphay abaanc hian phou the.

¹⁷Arou aruc how ngam the. Ata zauczihmei nunc ata howna neihla the.

¹⁸Kaniw san zaucna apheybaan nzanh the.

¹⁹He RINGHPOUC, akhou rui duc tatlou rio! Katumcna ata guang nkhavlou o!

²⁰Ata baengsaeng khou rui kanlou o; apanty hei mi si nunc khou rui kanlou o.

²¹Ata mi kamangliangpui pang khou rui kanlou o, mi nwmbangc guaichic nunc hu khou hei, aswang maek khe.

²²Nang rui taancloumei tei ai amei nunc khou rac ni; kaniw guang kariupui bamv khou mi kumcna thuanc ni:

²³“Kata thuanc o, RINGHPOUC bangc nunc! Kata champouh o, Jakob kikta nunc! Kata kalum o, Isaraelmei nunc!

²⁴Kamei lungcsimei ta ntaamvlou mak ge, kaniw ryanra thaylou e. kamei kaniw khou rui karih ntheilou mak ge; kaniw rui nkhavlou khang kauc pwkhou dawlou e.”

²⁵Nang rui taancloumei khang tei, charuangcdai bamv khou ai nang ta thuanc ni; ai rui nrianhlou kanmei tei nang ta kalum bammei nunc hu khou tiilou ni.

²⁶Hei tei lungcsimei nunc kaniw bung tu nggu kan diu. RINGHPOUC ta kalum khang guangmei guay kata thuanc puni. Kaniw tingsaengzaeng daic thau bam kan diu!

²⁷Zaatc guayna RINGHPOUC ta ningtow bam puni, kandih kabamv kathuic khou rui kakhou guang puni; zaatc guayna kata kalum puni.

²⁸RINGHPOUC hei guangh e, kamei rui zaatc guay ta sin bam e.

²⁹Daihlwn swna lungc bammei nunc tei, kakhou nkhum key puni; ringc suang lakmei maansei guay hei, kahu khou nkhum key puni.

³⁰Guang nimei meikin guay rui kasiamruai sw puni; meic nunc rui guang nimei kin khou RINGHPOUC lam raclou puni.

³¹“RINGHPOUC rui kamei nunc ta kanlou the” twmei, ntaw puanc patlou makmei mei nunc khou raclou puni.