Read Rongmei Naga KALUMLU 28 Bible Online

KALUMLU 28 - Rongmei Naga bible

KALUMLU 28

¹He RINGHPOUC, ata gaekloumeipu, ai nang ta kaw e. Ai kapna huaymei nkinglou o! Nang rui akhou dawlou mak ge thei, ai ni theihmei dic thangc key kan puni the.

²Nang tuang nthanmei Ravkai biak thangc, abaanc haamv thauna nkhavlou khang ai rui nang khou kapna huaymei hei chulou o.

³Meicsimei pang khou tei ata ganc pat kazauhlou rio, kaniw mwang khou thu gayna sa laki, kaniw lung khou karaeng bammei, simei taanv taanc bammei pang khou tei ganc pat kazauhlou rio.

⁴Kaniw taanv khang tei, kaniw rui taanc kanmei simei taanv khang tei, kaniw ta dandi tiilou o. Kaniw taanv guay khang tei kaniw ta dandi tiilou o; kaniw khang biuhmei dandi kaniw khang tiilou o!

⁵RINGHPOUC rui taanclou kanmei taanv, kabaanc rui taanclou kanmei ta tei kaniw thaylou mak ge; mi zaeng rui kamei rui kaniw ta dandi tii puni khatni tingsaeng khang swmut sutlou puni.

⁶RINGHPOUC ta thuanc o; kalam thu ai rui kapna huaymei kamei rui chulou the.

⁷RINGHPOUC rui ata gaeklou e khatni ding gaeklou e; ai kakhou lwmlou e. Kamei rui ata nkhavlou e khatni ata tineihlalou e; neihlamei lu suanna ai kata thuanc e.

⁸RINGHPOUC rui kamei nunc ta gaeklou e; kamei rui thauhteyloumei guangc ta gaeklou e khatni kanlou e.

⁹He RINGHPOUC, nang mei nunc ta kanlou o, nang mei nunc ta suaihiamlou o. Kaniw ta gaengclou o, khatni kaniw ta tingsaeng kadanlou o.