Read Rongmei Naga KALUMLU 30 Bible Online

KALUMLU 30 - Rongmei Naga bible

KALUMLU 30

¹He RINGHPOUC, ai nang ta thuanc e. Kalam thu nang rui ata kanlou the, ata zauczihmei nunc ta aruc khou tizaenggaylou mak ge.

²He RINGHPOUC, aRacguangc, nkhavlou khang ai nang khou kapna huaymei dawlouna nang rui ata tigaylou the.

³Nang rui ata tarou khou rui kanpatlou the. He RINGHPOUC, nang rui ata taruaih khou rui zay patlou datna apanty tiilou dat the.

⁴He kalat piumei nunc, RINGHPOUC ta thuancna suan o! Nthanmei kazanc thuanc o.

⁵Kalungpuam matat khat na de, karamgai thu tingsaeng e. Zingbangc mikdui luangc bam nuh e, tiki lauthwan neihla dat re.

⁶“Ata ngam dat ni tu hamh the” twna ai giuga makna sa ngam the.

⁷He RINGHPOUC, nang zauzian paan rui nang rui ata tanhmei chyngbut kumc kasiamh thaulou the. Tiki nang zaw nkamh kan pwkhou ai ping khwan e.

⁸He RINGHPOUC, ai nang ta kaw khwan e, nkhavlou khang mi kumcna ney khwan e:

⁹“Ai theihmei rui nang khang tabui gaeng nina cho? Ai tarou khou keymei rui tabui gaeng nina cho? Theihmei nunc rui nang ta thuanc ngam puni dina cho? Suai makmei nang ramgai tei kaniw sa ndauh ngam puni dina cho?

¹⁰Akhwan chulou o, he RINGHPOUC, ata zauc nzianlou o! Ata nkhavlou o, he RINGHPOUC!”

¹¹Alung ryanramei khou rui, nang rui ata neihlana ti-alaamhlou dat the, nang rui alung ryanra guay laa ganclou the, neihlamei tipadiklou the.

¹²Mi zaeng rui ai reih rei bam lak ge; ai nang ta thuancna suan bam ni. He RINGHPOUC, aRacguangc, ai nang ta tingsaeng thuanc bam ni.