Read Rongmei Naga KALUMLU 31 Bible Online

KALUMLU 31 - Rongmei Naga bible

KALUMLU 31

¹He RINGHPOUC, ai nang khou duplou e, ata zaw tisilou rio. Nang hei nchumhmei Racguangc e; ata kanlou o!

²Ai huayneymei chulou o! Ntaw ata kanlou o! Ata nang khou tiduplouna kanlou o; nang rui raengh swna ata kanlou o.

³Nang hei akhang taudaic e, nang hei araengc e; nang rui saloumei kumcna ata zaylou gaengclou o.

⁴Ata rik bammei khou rui kanduaklou o, ai nang khou duplou e.

⁵Ai apumc kahak nang rui kadanloumei khou tiilou e. He RINGHPOUC, nang rui ata kanlou puni; nang hei suai makmei Racguangc e.

⁶Ravmaengc kalummei nunc ta nang karaeng e; ai thu nang khou lwmlou e.

⁷Ai neihla zaenggay bam ni, kalam thu nang ata nzian bam e, khatni aryanra guay ta thaylou e.

⁸Nang rui ata zauczihmei nunc baanc khou tiilou mak ge, ai tat nimei bamv khou kadan makna tat khang nang rui swlou the.

⁹He RINGHPOUC, ata zauc nzianlou o, ai ryanramei khou keylou bam the; kapmei rui amik lak the, lungh ryanramei rui apumc suan the.

¹⁰Lungh ryanramei rui ai lak the, kapmei rui apanty tidui the. Ryanramei rui apumc suan the; arou nganvna zunh key the.

¹¹Ata zauczihmei guay rui, nkunna atuang kainingmei guay rui ata malana sw the; apammei guay ata how ping the; kaniw ata chaengdai khou how pwkhou, kaniw akhou rui pak the.

¹²Theic kanmei ta kumcna, meic kathuic ata amuc the; ai hei gancloumei puat kumc the.

¹³Zauczihmei nunc tanglum bammei ai chu the; kaniw ata swluai khang raengc bam e.

¹⁴Tiki nang khou ai lwm e, He RINGHPOUC, nang hei aRacguangc e.

¹⁵Nang rui makavloumei lungc khou ai bam e; ata zauczihmei nunc baanc khou rui kanlou o, ata rai kasic bammei nunc khou rui kanlou o.

¹⁶Nang bangc ata nzianna zauc keylou o, nang rui ata taek makna nzian bammei paan rui ata kanlou o.

¹⁷He RINGHPOUC, ai nang ta kaw e, ata tizaklou rio. Meicsimei nunc zak kan diu; kaniw taruaih ram thangc rimh rim bam kan diu.

¹⁸Mi saraamhmei nunc ta tei, ravchaptatmei nunc ta karaengna sa bammei nunc, gaengh swmei khatni ramhriw swmei nunc ta tei tirimh rimlou o.

¹⁹Nang ta champouhmei nunc khang chamdaanvlou bammei, nang ramgai adih charyn cho! Nang khou duploumei nunc khou, nang rui meic nunc mav khou hei tei lyanlou e.

²⁰Meic nunc rui swluai khang rik bammei khou rui nang pamv khou nkamhlou e, kaniw ta zauczihmei nunc rui tizaklou mak khang nang kai khou rylou e.

²¹RINGHPOUC ta thuanc o! Ata ding haengvna adow pwkhou, charynna kamei rui karam zian akhou lyanlou the!

²²Kamei rui ata kamav khou rui alay pat the twna ningna ping khwan e; tiki ai kapna huaymei, nkhavlou khang kauhmei, kamei rui chulou the.

²³Kamei rui lwmnuhmeithiu, RINGHPOUC ta nzian o. Lwmlounuhpui mei ta RINGHPOUC rui gaeklou e, tiki gaengh swmei nunc ta kaniw khang biuhmei dandi tii e.

²⁴RINGHPOUC khou lwmmeithiu, tanc o, bauc o.