Read Rongmei Naga KALUMLU 33 Bible Online

KALUMLU 33 - Rongmei Naga bible

KALUMLU 33

¹Ravchaptatmei nangniw, RINGHPOUC taanv ta tei neihlana kauc o! Kalat piumei nangniw kata thuanc o!

²Nrah downa RINGHPOUC ta thuanc o, kariang ruhmei nrac downa suan o.

³Kakhou lu thanh suan o, nrah zay chuyna neihlana kaucna suan o.

⁴RINGHPOUC lat guay hei nchumh e, khatni kataanv guay hei suai mak ge.

⁵Nchumhmei lev nzihmei ta RINGHPOUC kahaw e; taek makmei karamzian hei kandih padik ge.

⁶RINGHPOUC latdanv rui tingpuk damclou e, kamwang khou rui patmei latkaeng rui bw, neih, gaanchuangcna damclou e.

⁷Kamei rui duipui dui ta kabamv akhat khou khuam kaduailou e; duipui guay ta kasyng thangc mbangh binlou e.

⁸RINGHPOUC ta ping o, he mbaanv kapwm! Kata champouh o, he kandih nam ruc khou lungc bammei maansei katana!

⁹Kamei rui sa pat pwkhou kandih damc the; kalatdanv khou ramhguayna pat the.

¹⁰RINGHPOUC rui zaatc nunc tuang raeng guay tiguang tangclou mak ge; kaniw raeng guay kaniw ta titaanc key mak ge.

¹¹Tiki katuang raeng thu tingsaeng nai e, kalung khou ningloumei tei kalaih mak ge.

¹²RINGHPOUC ta kaRacguangc swmei zaat tei sangaymei zaat re; kakhang kadahloumei mei nunc tei sangaymei nunc e!

¹³RINGHPOUC tingkauh thangc rui zauc keyna maansei guayna ta how e.

¹⁴RINGHPOUC rui kaguangh bamvpaeng khou rui, kandih nam ruc khou naimei maansei katana ruc khou zauc key e.

¹⁵Kamei hei lungning tiiloumeipu e, kumna maansei rui taanhmei guay thay e.

¹⁶Guangh tei katuang ricmei geihmei paan rui rih ngam tu hamh e; rihmei tei kapumtan rui rih ngam tu hamh e.

¹⁷Takuanh paan rui rih ngam khang hamh e; tanhmei takuanc pumtan rui kanlou ngam mak ge.

¹⁸Tiki RINGHPOUC rui kalat piumei guay ta kadanna zauclou bam e; kamei rui taek makna nzianmei ramzian khou lwm bammei nunc ta kadanlou bam e.

¹⁹Kamei rui kaniw ta theihmei khou rui kanlou e; nkow-ndaapcmei ganv khou kamei rui kaniw ta tiringclou e.

²⁰Aniu RINGHPOUC ta lwmgayna nkhwan e; kamei aniu ta gaekloumeipu khatni aniu khang nggih e.

²¹Kapaan rui aniu neihla e; kazanc nthanmei khou aniu lwm e.

²²He RINGHPOUC, aniw nang ta lwmmei kumcna nang aniw ta taek makna nzianlou o.