Read Rongmei Naga KALUMLU 34 Bible Online

KALUMLU 34 - Rongmei Naga bible

KALUMLU 34

¹Ai RINGHPOUC ta thuancku tanh tan bam ni; kata thuanc tanh tan bam ni.

²Kataanv guay khang tei ai kata thuanc bam ni; ryanra ryanriumei nunc chuna neihla kan diu!

³RINGHPOUC hym ta aniu kauc ndauh kho; aniu kazanc thuanc kho!

⁴Ai RINGHPOUC khou huayney the, kamei akhou dawlou the. Kamei rui ata ai pingmei khou rui tiduaklou the.

⁵Ryanra ryanriumei nunc kata zaucna neihla e; kaniw zak dat lak khe.

⁶Ngangv bamv maekmei nunc rui kakhou kauc e, kumna kamei rui dawlou e; kaniw ryanra kaguay khou rui kanlou e.

⁷RINGHPOUC lat piumei nunc ta kabaanchara rui gaeklou e, kaniw ta kabiu kabaeng nimei khou rui kanlou e.

⁸RINGHPOUC hei adih gay cho twmei nang mbap zauc o. Kakhou duploumei nunc tei sangaymei nunc e.

⁹RINGHPOUC lat piu o, he kamei guay; kalat piumei guay khang gaat tuang nai lak ge.

¹⁰Kamangliangpui nganvna tu khang maekna ndaapcna lungc de; tiki RINGHPOUC lat piumei guay mu, gaat tuang nai dat mak khe.

¹¹Guang nking o, anac nuncle, RINGHPOUC ta pingna lungh khang ai nangniw khou nchamlou puni.

¹²Nang panty amanvna lungc nii bu cho? Nang panty lungsingmei khatni neihlamei kahaw bu cho?

¹³Kum e thei latsic sa mak khang khatni saraamh mak khang nang baley sinriap bo.

¹⁴Simei ta gancna gaymei taanc o; nchu-nzaenghna lungh khang karamc o.

¹⁵RINGHPOUC rui ravchaptatmei ta kadanna zauclou bam e, kaniw rui kapna huaymei chulou e.

¹⁶Tiki simei taanhmei nunc ta kamei nuh mak ge, kumna kaniw theic pwkhou kaniw ta amuc nuangc e.

¹⁷Ravchaptatmei nunc rui RINGHPOUC ta kaw pwkhou kamei rui chulou e, kaniw ryanra guay khou rui kaniw ta kan patlou e.

¹⁸Lungh bakna bammei nunc khou RINGHPOUC ana bam e; kaniw rigwn maan ngamna bammei nunc ta kanlou e.

¹⁹Ravchaptatmeipu ni ryanramei mpeyna ariw nuh de, tiki RINGHPOUC rui kata ryanramei khou rui kanlou e.

²⁰RINGHPOUC rui kata gaek tiph tipna gaeklou e, karou khat na sini swbau mak ge.

²¹Meicsimei ta kaniw tuang simei rui swluai puni; ravchaptatmei ta karaengmei nunc ta dandi tii puni.

²²RINGHPOUC rui kamei nunc ta kanlou puni; kakhou duploumei guay ta gulou puni.