Read Rongmei Naga KALUMLU 35 Bible Online

KALUMLU 35 - Rongmei Naga bible

KALUMLU 35

¹He RINGHPOUC, ata athwngmei nunc ta athwnglou o, ata adowmei nunc ta adowlou o!

²Nang tuang nggic sin thauna ata guang nkhavlou o.

³Ata suic bammei nunc ruc khou nang tuang buy-baeng sinthaulou o. Nang rui ata kanlou puni twmei akhou salou o.

⁴Ata swluai khang rik bammei nunc ti hei, zaw tisilou o, tizaklou o! Ata sw kasic khang sw bammei nunc hei meiczingc gancna hanc dat kan diu!

⁵RINGHPOUC baanchara rui kaniw ta nthau bammei hu khou, kaniw tei mpwan rui phungc tat bammei napgung kumc kan diu!

⁶RINGHPOUC baanchara rui nthau bammei hu khou, kaniw chaeng zingc kan diu, kaniw chaeng ani kan diu.

⁷Kalam maekna kaniw rui akhang phah zawlou e, khatni ata nym khang khunh nthukmei chaulou e.

⁸Tiki thay mak liangna kaniw ta sw kasic karouclou kan diu! Kaniw tei kaniw rana kaniw phac manc kan diu; kaniw rana kaniw khunc khou keylou kan diu!

⁹Khou kiu RINGHPOUC paan rui ai zaenggay puni; kamei rui kanloumei zaeng rui ai neihla puni.

¹⁰“Nang kumhmei maek ge. Nang rui suanmei ta tanhmei khou rui, lungcsimei ta rairiumei khou rui gaeklou the,” twna alung kapwm rui ai RINGHPOUC khou sa puni:

¹¹Meicgay makmei nunc rui akhou khuay nkhamlou e, ai thay zat makmei khuay akhou nkhamlou e.

¹²Kaniw rui akhang gaymei phaan simei taanclou e; aswang maek khe.

¹³Tiki kaniw suc nuh bam pwkhou, ai ryanra zaengsimei pwan piu e, ai taektw thiangcna, angaengv khou apy sowlouna huayney khwan e.

¹⁴Ai rui apammei khang hamh e thei chana khang huayney khou tei pui ta zaengsina huay kumc, zaengsina nkhumna tat bam khwan e.

¹⁵Tiki ai ryanra pwkhou kaniw neihlana guang kariu e, ata sinnui khang guang kaduai e; ai thay how makmei nunc rui ata bai the, bai nthaekc makna bai bam e.

¹⁶Phay baanh chuanchaymei ta sinnui kumc, ata karaengna sinnui the.

¹⁷He RINGHPOUC, asaanh nang zauc bam nina cho? Kaniw rui adow guangmei khou rui ata gulou o; mi kamangliangpui nunc khou rui, aringcpaan kanlou o!

¹⁸Kum pwkhou nang mei nunc kariumei bamv khou, ai nang ta thuanc ni, kaniw mav khou ai nang ta thuanc ni.

¹⁹Kalam maekna ata zauczih bammei nunc ta tei, aruc khou tizaenggaylou rio. Kalam maekna ata karaengmei nunc ta tei, alung ryanramei ta zaenggayna tinuiclou rio.

²⁰Kaniw chamv chianggayna sa mak ge; chuzaenghmei laa niimei nunc ruc khou saraamhmei khuay nkham ndam guang e.

²¹“Nang taanc bammei tei aniw mik kahak rui how the,” twna kaniw ata nkham e.

²²He RINGHPOUC, mi hei nang how the; reih reilou rio, akhou rui duc lou rio, he RINGHPOUC!

²³He RINGHPOUC, thaulou o, ata dinggaeklou o; aRacguangc, thaulou o, akhang saguclou o.

²⁴He RINGHPOUC, nang thu nchumhmei e, ata latzan sw nthanlou o, ata zauczihmei nunc ta aruc khou tineihlalou rio.

²⁵“Gay the! Aniw kahawmei guang tangc the, aniw rui kata sw kasiclou kan the,” twna tisalou rio.

²⁶Ai ryanramei ta zaenggaymei nunc ta tei zaw tisilou o, tikaguakc kasuakclou o; aruc khou kaniw gaengh sw bammei nunc ta tei tizak kasiclou o,

²⁷Ata duak pat kan tu laa niimei nunc tei rui, “RINGHPOUC hei adih daic cho! Kabangc zawkauhmei khou kamei neihla e,” twna neihlana kauc bam kan diu.

²⁸Kum pwkhou nang hei nchumhmeipu e twmei ai kauc ndauh ni, ai nang ta thuanc zingc zingc bam ni.