Read Rongmei Naga KALUMLU 36 Bible Online

KALUMLU 36 - Rongmei Naga bible

KALUMLU 36

¹Paapc rui meicsimei lung syng khou sa bam e; kamei Ravguangc ta laalou mak ge, kata ping mak ge.

²Kalam thu kamei karana kata ning kauh the, Ravguangc rui kapaap ta thay ni tu hamh e, kakhuay thay ni tu hamh e, twna kamei kakhanh e.

³Kalatsav simei khatni saraamhmei rui padik ge; ningtyngmei khatni gaymei taanv kamei taanh mak ge.

⁴Kamei kalaeng khou nganv, simei taanh khang rana kakhanh e; kamei rui taanhmei taanv gaymei khat sini maek ge, simei ta ganh mak ge.

⁵He RINGHPOUC, taek makmei nang ramzian hei tingpuk kau kauh tangc e. Nang tuang suai makmei lwnlung hei tingpuk kau kauh e.

⁶Nang nchumhmei hei chyngbut twan kumc kauh taph tap e; nzihmei nang latzan hei duipui thukh saanv nthuk ge. Maansei khatni khouringh guay ta kadanlou bam e.

⁷He RINGHPOUC, nang rui taek makna nzian bammei ramzian hei adih kungc kan tu cho! Nang swkaeng lim khou aniw duplou e.

⁸Nang rui mphamh mphaahna kicloumei khwmkih taektw aniw tu the; nang ramgai duithuak khou nang rui aniw ta tizangvlou the.

⁹Ringhpaan kaguay hei nang khou na rui guang tuang e; nangriw rui aniw ta tigaanclou e.

¹⁰Nang ta thaymei nunc ta nzian tanh tanlou o, ravchaptatmei nunc khou gaymei taek makna taanclou o.

¹¹Daihriw swmei nunc rui ata adow khang nuhlou rio, meicsimei nunc rui ata ti-alay ganclou rio.

¹²Meicgay makmei nunc ta tei kaniw bow keyloumei bamv khou tei zauc lo. Kaniw thau dat ngam makna zip bam e.