Read Rongmei Naga KALUMLU 37 Bible Online

KALUMLU 37 - Rongmei Naga bible

KALUMLU 37

¹Meicsimei nunc zaeng rui lungh geih rio; nkhuaimei taanv taanc bammei nunc ta mamav riu.

²Kaniw tei puc bwan kumc maan nuangc kan ni de; ramh bwan kumc theic kan puni.

³RINGHPOUC khou lwm o, gaymei taanc o, lungh geih kadan makna mi kandic khou hei lungc bam o.

⁴Nang RINGHPOUC khou neihla bam o, kum e thei nang rui kahawmei tei, kamei rui tiilou puni.

⁵Nang panty RINGHPOUC khou tiilou o; kakhou lwmlou o, kamei rui nang ta nkhavlou puni;

⁶kamei rui nang tuang ravchaptatmei panty tei tinggaanc neih souh kumclou puni, nang tuang nchumhmei panty tei neihrinkin neic kumc tigaanclou puni.

⁷Khaengv saengc o, RINGHPOUC maan zauc o. Lungcgay thau bammei nunc, khatni kaniw tuang simei raeng guang tangc bammei nunc lam khou tei rui lungh geih riu.

⁸Lunghpuamh riu, lungh ryanra riu; hei tei rui simei khou zaylou puni.

⁹RINGHPOUC khou lwmloumei nunc tei mi kandic hei laa puni; meicsimei nunc ta alay ganc puni.

¹⁰Meicsimei nunc tei maan nuangc kan ni de; nang kaniw ta phu bam sini phu tow dat lak khe.

¹¹Niamhmei nunc rui mi kandic hei laa puni; lungc chingkhiuhna, chuzaenghna lungc bam puni.

¹²Meicsimei nunc rui ravchaptatmeipu ta sw kasic khang nrik bam e, kaniw huc khaic ndyang kariak riak bam e.

¹³Tiki RINGHPOUC rui meicsimei nunc ta nuic e, kalam thu kaniw ta swmaan nimei tingmik ana the twmei kamei thay e.

¹⁴Lungcsimei khatni lungcthuy lakmei nunc ta swluai khang, nchumhmei taanhmei nunc ta swluai khang, meicsimei nunc baengsaeng sat pat the, kaniw saucpai mbwng pat the.

¹⁵Tiki kaniw baengsaeng rui kaniw lungthw biw puni, kaniw saucpai guay swtuai puni.

¹⁶Ravchaptatmei tuang katit na naimei tei, meicsimei nunc tuang lanv guay suangc gaeng e.

¹⁷Kalam thu RINGHPOUC rui meicsimei nunc baancpwam riam baulou puni, tiki ravchaptatmei ta gaeklou e.

¹⁸RINGHPOUC rui kalat piumei guay ta kanlou e; mi kandic hei tingsaeng kaniw khang sw puni.

¹⁹Kaganv simei ganv khou kaniw ryanra lak ge, nkow-ndaapcmei ganv khou, kaniw khang gaat tuang nai lak ge.

²⁰Tiki meicsimei nunc theic puni; RINGHPOUC ta zauczihmei guay mwnpwang kumc maan kan puni; maikhou kumc maan puni.

²¹Meicsimei nunc kaniw pow khangh mak ge, tiki meicgaymei thu baanh daicna tiipat re.

²²RINGHPOUC suaihiam phunghmei nunc rui mi kandic hei laa puni; tiki kasyang keyloumei nunc ta alay ganc puni.

²³RINGHPOUC rui meicgaymei ta kamei tat nimei chaeng khou zaylou e, kata tipianmei nunc ta gaeklou e.

²⁴Kaniw bow key sini, bow suang bam lak ge; RINGHPOUC rui kaniw ta zay thaulou dat puni.

²⁵Ai karacpouc di the; lungc saengc sih the; tiki ravchaptatmei ta RINGHPOUC rui ganc patloumei ta, kanac nunc neytu bammei ta how mak ge.

²⁶Kamei kabaanc daicna tiipat tanh tan bam e, meic nunc khang tipou pat re, kanac nunc hei suaihiam e.

²⁷Simei khou rui tat pat ro, gaymei taanc o; kum e thei nangkik nangta mi kandic khou hei lungc tanh tan bam puni.

²⁸Kalam thu RINGHPOUC thu nchumhmei ta kahaw e, lwmnuhmei kamei nunc ta mpat mak ge. Kamei rui kaniw ta tingsaeng gaeklou e; tiki meicsimei kikta guay ta alay ganc puni.

²⁹Ravchaptatmei guay rui mi kandic hei laa puni, mi khou hei tingsaeng lungc bam puni.

³⁰Ravchaptatmei mwang khou rui ningting lat sa pat re, kaniw baley khou rui nchumhmei lat sa pat re.

³¹Kamei kaRacguangc latdanv kalung khou lou e, mi khou tei rui tat pat mak ge.

³²Meicsimei rui meicgaymei ta rik bam e, swluai khang phu bam e.

³³Tiki RINGHPOUC rui kata zauczihmei baanc khou mpatlou lak ge, kata latzan sw pwkhou ti-nkhuai lak ge.

³⁴Nang RINGHPOUC khou lwm o, kalatdanv guay piu o; mi kandic hei nang khang tiilouna kamei rui nang ta champouhlou puni, meicsimei nunc ta swmaan kanmei ta nang how puni.

³⁵Raina dihsinmei meicsimeipu gaanv khat ta ai howlou e. Kamei Lebanon tuang sidar bang kumc meic kathuic ruc khou kauh thau khwan e.

³⁶Tiki katangv thangc ai tat ruan pat dat pwki, kamei bam mak khe; ai kata phu the, ariw dat mak khe.

³⁷Meicgaymei ta matat ro, ravchaptatmei ta kathaina zauc o; chuzaenghpui mei tei kakik kata nai kan tw e.

³⁸Tiki paapcmei nunc ta swmutlou e, kaniw kikta maek ge.

³⁹RINGHPOUC rui ravchaptatmei nunc ta kanlou e, ryanramei ganv khou kaniw ta gaeklou e.

⁴⁰Kamei rui kaniw ta nkhavlou e, khatni guduaklou e; kaniw ta meicsimei nunc baanc khou rui kanlou e, kalam thu kaniw kakhou duplou e.