Read Rongmei Naga KALUMLU 38 Bible Online

KALUMLU 38 - Rongmei Naga bible

KALUMLU 38

¹He RINGHPOUC, nang lungpuam khou ata riaplou rio!

²Nang tuang pailu rui ata kabiu the, aruc khou nang baanc keylou the.

³Nang lungpuam rui apumc khou gaymei bamv khat sini maek khe, apaap zaeng rui arou suc tangc the.

⁴Ata apaap rui thum liam the, ai phungc ngam mak khe.

⁵Ai mpang khwanmei zaeng rui, azam guay hei taamc namh si the.

⁶Ai nkuan key the, ai ryanra the; kalangh zingc zingc bam e.

⁷Asian mai kumc chaengc the. Apumc khou gaymei bamv maek khe.

⁸Ai nsuan the khatni puat the; alung ryanrana kalangh the.

⁹He RINGHPOUC, ai kahawmei guay nang mav khou lamclou the; ai kalanghna rah bammei guay nang chu e.

¹⁰Abuc kabamv bam mak khe, apumtan maek khe, amik zingc key the.

¹¹Azam zei guay zaeng rui, apam nunc khatni kainingmei nunc adaeng tuanc nii mak khe, akai kaikhuncmei nganv mpaan tat kan the.

¹²Ata swluai khang rik bammei nunc rui ni akhang phah zawlou the, ata sw kasic niimei nunc rui sw kasic khang rac bam e; kaniw ata sw kasic khang kaphianh zingc zingc bam e.

¹³Tiki ai thu nu ndymei kumc chulou mak ge, lat sa thay makmei kumc mundaw mak ge.

¹⁴Ngguay, ai hei chu thay makmei kumc sa daw mak ge.

¹⁵Tiki ai nang ta lwm e, he RINGHPOUC. He RINGHPOUC, aRacguangc, nang rui dawlou puni twmei ai lwm e.

¹⁶Ata zauczihmei nunc zaenggay khang ata tiryanralou rio; kaniw zaw kauh khang ata tibowlou rio.

¹⁷Ai bow key puni the, suhmei nthaekc mak khe.

¹⁸Ai nkhuai mbaloumei guay kalauh the; apaap khang alung kabiu the.

¹⁹Kalam maekna ata howmumei nunc hei tanc e; nkhuaina ata karaengmei geic e.

²⁰Ai rui gayna swlou tiki ata zauczih the, kalam thu nchumhmei taanh khang ai karamc e.

²¹He RINGHPOUC, ata ganclou rio! He RINGHPOUC, akhou rui duc tatlou rio!

²²He Kaipouc, ata kanloumeipu, ntaw ata nkhavlou o!