Read Rongmei Naga KALUMLU 39 Bible Online

KALUMLU 39 - Rongmei Naga bible

KALUMLU 39

¹“Ai ramhthayna lungc bam ni, abaley rui paapc taanh mak khang karamc ni; meicsimei nunc adaeng khou bam saanv, amwang karak bam ni” twna ai ning khwan e.

²Ai gaymei lat sini sa makna reih reina bam khwan e; tiki asunu si ranv gut khwan the,

³lungh geic kadanmei padik guang khwan the. Kakhanh hay ryanra hay hay khwan the; sa mak ngam makna,

⁴“He RINGHPOUC, ai hei asaanh ringc nina cho? Ai tabui nungc theic nina cho? Adih zaicna apanty luai nina cho? Akhou dinclou o,” twna sa pat khwan the.

⁵Nang rui apanty kuchik saanv na damclou the, aringcting dui dut na de. Maansei ringcting asaanh mak ge, meicthiu na kumh tuang de.

⁶Maansei rui taanc bammei guay hei ramhkhat na khang sini hamh e; lanv khuam kaduai e; hei tei thow laa puni cho thay mak ge.

⁷Kum e thei tabui ta ai rigwn ni, he RINGHPOUC! Ai nang ta na rigwn bam ni.

⁸Apaap guay khou rui ata kanlou o, ata mi mpangmei nunc tuang sinnui bamv tiswlou rio.

⁹Ai reih rei bam puni, ai lat sa lak ge, kalam thu ata mi kumcna tiryanraloumei hei nang rui de.

¹⁰Ata rai nthaekclou tho! Nang baanc zam rui ai theic puni the.

¹¹Nang rui maansei ta paapc zaeng rui luhna riap pwkhou, nang rui kaniw lanv guay nthumc rui kumc swmut re. Maansei hei meicthiu na kumh tuang de!

¹²He RINGHPOUC, ai huaymei chulou o, ai kapna huaymei nkinglou o; ai kap pwkhou ata guang nkhavlou o. Apu apouc nunc kumcna ai hei matat khat na khang nang gin de.

¹³Ai kandih khou rui tat pat makmei dak khou, ai theih makmei dak khou neihla dat nuh khang ata mpatlou o.