Read Rongmei Naga KALUMLU 40 Bible Online

KALUMLU 40 - Rongmei Naga bible

KALUMLU 40

¹RINGHPOUC rui nkhavloumei ta ai akhaengvna nkhwan bam khwan e; kamei beic keylouna ai rui kapna huaymei chulou khwan e.

²Kamei rui ata theic nuhmei bih khunc khou rui zay patlouna, taudaic ruc khou tidinglou khwan e; giuga makna tibamlou khwan e.

³Kamei rui akhang lu thanh, aniu Racguangc ta thuanhpui lu tiilou khwan e. Meic mpeyna mi hei howna ping puni, kaniw Ravguangc khou lwmlou puni.

⁴RINGHPOUC khou lwmloumei nunc tei zaenggaymei e, rav baihmei khou chaeng maanv tat kanmei nunc, daihriw swmei nunc khou laylou makmei nunc tei zaenggaymei nunc e.

⁵He RINGHPOUC, aniw Racguangc, nang rui aniw khang charynmei taanv mpeyna taanclou the; aniw khang charynmei raeng mpeyna raengclou the. Nang kumhmei baihmei maek ge! Mi guay tei ai chakna rac ni twna chak bam sini chak ngam thay lak ge.

⁶Ravkhaengmei khatni puatkat ta nang kahaw mak ge, ravchapaeng khou rawna khaeng khang, khatni paapc khang khaeng khang nang ney mak ge. Tiki, nang lat chu khang nang rui akhang nukuanc tiilou the.

⁷Kumna ai daw khwan the, “Mi khou hei ai bam e; nang rui akhang dincloumei tei latdanv Latrikzy khou nai e.

⁸Ai nang chwn piu nii e, he RINGHPOUC! Nang latdyn tei ai alung khou lou e.”

⁹He RINGHPOUC, nang rui aniw ta kawlou the twmei gaychamv hei nang mei nunc kariumei bamv khou ai sa ndauh the. Mi hei sa taan zat lak ge twmei nang thay e.

¹⁰Kanloumei chamv tei akhou na rylou bam lak khe; nang lat suai zat makmei, khatni nang rui kanloumei lam hei kaganv thuic rac the. Nang mei guay rui kaduaimei bamv khou tei, ai reih rei bam mak khe nang tuang taek makmei ramzian, khatni nthukna kadanloumei lam tei, nkamh makna raclou the.

¹¹He RINGHPOUC, nang rui ata zauc nzianlou taan zat ni tu hamh e twmei ai thay e. Nang ramzian khatni nang lat suai zat makmei paan rui ata gaeklou tanh tan puni.

¹²Kasing chak ngam lakmei ryanra ryanriumei akhou padik guang the; apaap guay rui ata kasiatc liam the, amik rak pat ngam mak khe; apaap asam suangc geic the, ai bauc ngam mak khe.

¹³He RINGHPOUC, ata kanlou o, ntaw ata nkhavlou o!

¹⁴Ata swluai khang rik bammei nunc ti hei zaw tisilou o, titamangvlou o. Ata sw kasiclou nina bammei nunc hei zakna pak kan diu o.

¹⁵Ata sinnui bammei nunc ti hei kaniw zaw tisilou o.

¹⁶Tiki nang khou guangmei guay zaenggay diu khatni neihla diu! Nang rui kanloumei khang thuancku bammei nunc tei, “RINGHPOUC hei adih gay cho!” twna sa bam kan diu.

¹⁷He RINGHPOUC, ai hei lungcsi lungcsakmei e; tiki nang ta amuc mak ge. Nang hei ata kanloumeipu e khatni aRacguangc e; ata nkhavlou khang katumcna guanglou o!