Read Rongmei Naga KALUMLU 41 Bible Online

KALUMLU 41 - Rongmei Naga bible

KALUMLU 41

¹Lungcsimei khang kadanlou thaypui mei tei sangaymei e, kamei ryanramei ganv khou RINGHPOUC rui kata nkhavlou puni.

²RINGHPOUC rui kata gaeklou puni, kapanty kanlou puni; kamei rui kata mi kandic khou hei tineihlalou puni, kata zauczihmei nunc ngamv khou mpatlou lak ge.

³Kamei sucnu key pwkhou RINGHPOUC rui kata nkhavlou puni, kata tigaylou puni.

⁴“He RINGHPOUC, nang khou ai paapc taanc the, ata zauc nzianlouna tigaylou o,” twna ai sa khwan e.

⁵“Kamei tabui nungc theic puni cho, tabui nungc kazanc maan puni cho?” twna ata zauczihmei nunc karaengna sa bam e.

⁶Ata zauh khang guangmei nunc kaniw lung nthan mak ge; alam khou simei chamv kaniw khuam kaduai e, kumna tat patna hei tei rac lik sik tat re.

⁷Ata karaengmei guay rui khat khat khou alam khou tanglum bam e, kaniw alam khou ning kasic the.

⁸“Kamei theic nina nnau bam the; kamei kalaeng khou rui thau dat ngam ni tu hamh the,” twna kaniw sa bam e.

⁹Apam gay liangmei, ai lwm liangmei, ai lev tu nchamcmei rui nganv ata zauczih the.

¹⁰He RINGHPOUC, ata zauc nzianlou o, kumna ata tigaylou o. Ata zauczihmei nunc khwm tikhangclou dat ro.

¹¹Kaniw ata ngam ni tu hamh e, nang rui ata pian bam de twmei ai thay e.

¹²Nang rui ata nkhavlou puni, kalam thu ai nchumhna lungc e; nang rui ata nang mav khou tingsaeng tilungclou puni.

¹³RINGHPOUC ta thuanc o, Isarael Racguangc ta thuanc o! Ntaw khatni tingsaeng kata thuanc o! Amen! Amen!