Read Rongmei Naga KALUMLU 42 Bible Online

KALUMLU 42 - Rongmei Naga bible

KALUMLU 42

¹Chakhaengv rui nchumei duithuak ta kahaw kumc, ai nang ta kahaw e, he Ravguangc;

²ai nang ta tari e, he Ringhmei Racguangc. Tabui nungc rui ai nang mav khou guang kalum dat nina cho?

³“Nang Racguangc tabui thangc bam kanna cho?” twna ata zauczihmei nunc rui akhou thanv bam khou, zingbangc kalaanv amikdui rui anapmi sw bam e.

⁴Tat kanmei ganv tei ningtow pwkhou alung bak ge: meic kangdai lev Ravguangc kai thangc tat bammei, kaniw rui tat bam khou kaniw ta chaengzay tat bammei, neihlamei kangdai Ravguangc ta thuanhpui lu kaucna lwan tat bammei tei ningtow pwkhou, alung kabiu e.

⁵Tabui swna ai heidi zaeng si bam tu cho? Tabui swna ai heidi lungh ryanra bam tu cho? ARacguangc ta ai lwm ni khatni kata thuanc dat ni, ata kanloumeipu khatni aRacguangc ta lwm ni, kata thuanc dat ni.

⁶He aRacguangc achwn hei karum key the; hei zaeng rui Jordan ramv khou rui, khatni Hermon chyng lev Mizar chyng khou rui nang ta ningtow the.

⁷Alung khou tiguang the; katuakc katitmei duidaih kumc alung khou karo bam e.

⁸Apanty Ravguangc khou zingbangc kalaanv huayna lu suan bam khang, RINGHPOUC rui taek makmei karam zian tei, kalaanv nzianlou diu.

⁹Ravguangc ata gaekloumeipu khou ai rui sa e, “Tabui swna nang ata amuclou tu cho? Tabui swna ata zauczihmei nunc rui sw kasicna swmei khou rui, ai mi kumcna ryanra khaengv bam nina cho?”

¹⁰“Nang Racguangc tabui thangc cho?” twna kaniw rui matevna sa bammei rui, arou khou baengsaeng biw kumc the.

¹¹Tabui swna ai heidi lungh zingc bam tu cho? Tabui swna ai heidi katuakc bam tu cho? Ai Ravguangc khou lwm ni, ata kanloumeipu khatni aRacguangc ta ai thuanc dat ni.