Read Rongmei Naga KALUMLU 44 Bible Online

KALUMLU 44 - Rongmei Naga bible

KALUMLU 44

¹Reynungc aniw pupouc kin khou nang rui taanvdaih taancloumei lam tei, aniw pupouc nunc rui aniw khou raclou the. He Ravguangc, aniw nu kahak rui hei tei chu the:

²Akumhna nang rui, ravmaengc kalummei nunc ta, nthau gancna nang mei nunc ta kaniw kandic khou hei tilungclou khwan cho, akumhna nang rui zaatc baihmei guay ta dandi tii kan tu cho, khatni nang mei nunc ta tilungc thaulou kan tu cho twmei aniw chu the.

³Nang mei nunc hei kaniw tuang baengsaeng rui mi kandic hei laa tu hamh e, mi hei kaniw pumtan rui laatow tu hamh e. Mi hei nang ngamv khatni nang pumtan rui khwan e, nang rui zauc nzianloumei paan rui khwan e. Kalam thu nang kaniw ta nzian khwan e.

⁴Nang hei aguangc e khatni aRacguangc e; nang rui nang mei nunc ta rih tingamlou the,

⁵nang baantan rui aniw ta zauczihmei nunc ta aniw rui ngamlou the.

⁶Ai atuang saucpai khou ngangvlou mak ge, atuang baengsaeng rui ni ata kanlou ngam mak ge.

⁷Tiki nang rui aniw ta zauczihmei nunc khou rui kanlou the, aniw ta karaengmei nunc ta ngamlou the.

⁸Aniw kaganv thuic nang ta thuanc bam ni, tingsaeng nang ta thuancku bam ni.

⁹Tiki ntaw thu nang rui aniw ta ganc patlou the khatni aniw ta zaw tisilou the; nang aniw tuang ricmei nunc lev tat nchamclou dat mak khe.

¹⁰Aniw ta zauczihmei nunc hu khou rui aniw ta tipaklou the, kumna kaniw rui aniw tuang asut kan the.

¹¹Lauziu nunc ta kumc aniw ta dow luai khang nang rui nuhlou the; nang rui aniw ta gindic thangc nthau phaklou the.

¹²Nang rui nang mei nunc ta kamanv maekmei puat ta kumc huanghna zuanclou the.

¹³Nang rui aniw khou taanclou kanmei tei aniw kainingmei nunc how the; kaniw aniw ta sinnui the khatni nuic the.

¹⁴Nang rui aniw ta zaatc pang khou karaengmei puat tiswlou the; aniw ta karaengna kaniw py kazinh the.

¹⁵Ai kaganv kathuic zawsi the, zakmei rui ata gumliam the.

¹⁶Ata zauczihmei nunc, khatni ata karaengmei nunc rui sinnuimei ta nkingna bam di the.

¹⁷Aniw nang ta amuc mak sini, aniw ding kanmei latdyng swbak mak sini, mi guay hei aniw khou guanglou the.

¹⁸Aniw lat liam mak ge; aniw nang latdanv guay piu bam de.

¹⁹Kum sini nang rui aniw ta nwmbangc khouringc nunc bamv khou ganclou the; nang rui aniw ta zingc miuh miumei bamv khou ganclou the.

²⁰Aniw rui aniw Racguangc ta kalum taanna rav baihmei ta kalum khwan e thei,

²¹nang hei tei thay puni de; nang thu aniw tuang nkamhmei lungning tei thay e.

²²Tiki aniw ta dow luai zingc zingc bammei hei, swluai nimei lauziu ta kumc aniw ta sw bammei hei nang zaeng khang rui e.

²³He RINGHPOUC, thaulou o! Tabui swna nang zip bam tu cho? Rakpatlou o! Aniw ta ganc suanglou rio!

²⁴Tabui swna nang aniw khou rui nkamh bam tu cho? Tabui swna nang aniw ramrianra khatni rairiu khaengvmei ta amuclou bam tu cho?

²⁵Aniw kandih nkhum tangc the, kandih khou zip bam the.

²⁶Aniw ta guang nkhavlou o! Nang rui aniw ta taek makna nzian bammei paan rui aniw ta kanlou o!