Read Rongmei Naga KALUMLU 45 Bible Online

KALUMLU 45 - Rongmei Naga bible

KALUMLU 45

¹Ai rui mi lu hei guangh khang phuak pwkhou, alung khou nuh gaymei lat padik ge, abaley hei hy thaymeipu kolom kumc e, latzaeng duidow kumc e.

²Nang hei nggaanv pang khou lwn gayliang e; nang hei lat sa chuy e. Ravguangc rui nang ta suaihiamlou bam e.

³Nang tuang baengsaeng phungc tho, he tancbauhmei guangc; nang hei katik kagunc daic liangmeipu e.

⁴Nchumhmei khatni nzihmei ta ding gaek khang, nang gunc daicna tat pat tho, suc ngam rih ngam tho! Nang pumtan rui rihdai mpeyna ngam ni!

⁵Nang tuang pailu guay ntuk ge, mi guay tei rui nang ta zauczihmei nunc lungthw hui alamv e, zaatc guay nang phaypav khou pun key ni.

⁶Ravguangc rui nang khou tii kanmei guangcdic tei tingsaeng nai bam puni. Nang rui nang mei nunc ta nchumhna sin puni.

⁷Kalam thu nang nchumhmei ta kahaw e, simei ta karaeng e. Mi zaeng rui Ravguangc, nang Racguangc rui nang ta kadahlou the, guangh baihmei khou suangc nang khou neihlamei mbuna bun keylou the.

⁸Agaw khatni gumh rym nang phey baan khou padik ge; guaipuang nei rui karuhloumei guangckai khou, lu suanmei nunc rui nang ta tineihlalou e.

⁹Nang tuang guangckai aluc pang khou guangh nac aluh nunc bam e, nang guangc bamvpaeng baanzat khou nthanmei kachaekc rui karuhmei liammavpui ding bam e.

¹⁰Guangh tuang nowpeicle, ai samei hei nking o— nang mei nunc khatni nang riang luaic guay ta amuclou o.

¹¹Nang lwn ramgai rui guangh nang ta kahaw puni; kamei nang kaipouc e, kumna nang kalat piu nina e.

¹²Turmei nunc rui nang khou kaipat phungc guang puni, lungcgaymei nunc rui nang zaeng laa khang karamc puni.

¹³Guanghkai khou bammei guangh nacpui tei adih how gay kan tu cho? Katuang pheychuanh kachaekc riang rui dakna karuh e.

¹⁴Kachan karangmei pheychuanh piuna, nowpeic huam nunc kathei lwanna, kata guangh khou nduangh guang e.

¹⁵Kaniw neihlana guangna guanghkai khou gut re.

¹⁶Aguangc, nang nac mpouh geicna lungc guang di tho, guangh swna nang pu nang pouc nunc bamv lyn bam di tho, nang rui kaniw ta kandih kapwm khou dihsinpouc nunc tiswlou di tho.

¹⁷Alu rui nang zanc gaymei tingsaeng titatlou puni, guang nimei ganv guay khou meic kathuic rui nang ta thuanc puni.