Read Rongmei Naga KALUMLU 49 Bible Online

KALUMLU 49 - Rongmei Naga bible

KALUMLU 49

¹Meic kathuicna nking o! Mbaanv khou lungc bammei meic katana,

²daihmei ni nthyammei ni, lungcgaymei ni lungcsimei ni, mi hei nking o.

³Ai ningting lat sa puni; alung khou rui sa patmei lat rui kabahthay khang tiilou puni.

⁴Ai latkwdyn nking ni, nrah downa mi kabac guay tei dinc ni.

⁵Meicsimei zauczihmei nunc rui ata ding haengv guang pwsini ping mak ge.

⁶Meicsimei nunc tei kaniw tuang lanv khou lwmlou e, kaniw ramlunggai khou kaniw gaengh sw e.

⁷Gaanv khat na sini karana kata thuak ngam lak ge; karingcting liu khang Ravguangc khang tii khang ramh maek ge.

⁸Maansei panty manv hei heidikamv khang kungc e, ram khat na rui sini biuhmei chak maek ge.

⁹Kata taruaih khou rui tiduaklou khang, kata ti theih mak khang twmei hei.

¹⁰Ningtyngmei guay ni, mpangmei nlomei guay lev nchamcna theic e twmei meic kathuic how e. Kaniw lanv tei kaniw tou nac nunc khang ganclou duc kan the.

¹¹Ramv tei kaniw tuang the twna kaniw zanc khou lou bam sini, kaniw tuang tingsaeng kai thu tarou tei de.

¹²Maansei karam saeng dai rui kata theihmei khou rui kanlou ngam mak ge; khouringh kumcna kamei ni theic muay puni de.

¹³Zauclo, kaniw rana khou lwmmei nunc khou tabui pat kan tha, kaniw lanv rui pianna bammei nunc san tei tabui kumh tha?

¹⁴Lauziu nunc kumc kaniw taruaih key kan the, mi khou tei theihmei rui kaniw ta sin bam puni the, kaniw kai ganclou ducna tarou khou kaniw taamc kan the. Ravchaptatmei nunc rui kaniw ta ngam the.

¹⁵Tiki Ravguangc rui abumaengc tarou khou rui thuaklou puni, kamei rui ata kakhou laathaulou puni.

¹⁶Meic gaanv khat lungcgay thau pwkhou, kalanv geic thau pwkhou nang mamav riu.

¹⁷Kamei theic pwkhou hei tei phungc tat ni tu hamh e; kalanv tei tarou thangc kathei lay tat mak ge.

¹⁸Meic gaanv khat ta mi panty rui tipianlou sini, khatni kataanv guay guang tangcna kata thuanc bam sini,

¹⁹kamei ni theihmei khou, tingsaeng zinghmei bamv khou, kapu kapouc nunc thei lay bam muay kan ni de.

²⁰Maansei karam saeng dai rui kata theihmei khou rui kan ngam mak ge; kamei ni khouringh kumcna theic muay puni de.