Read Rongmei Naga KALUMLU 50 Bible Online

KALUMLU 50 - Rongmei Naga bible

KALUMLU 50

¹Ngamparymei Racguangc, RINGHPOUC rui sa e; kamei rui neihpat khou rui neihkey kandic kapwm ta kaw e.

²Gay nthuihmei kaidai Zaion khou rui, Ravguangc gaanc pat re.

³Aniu Racguangc guang the, kahu khou kau mutmei mai bwang chuangcna, pwanzingh dai khou kamei guang the.

⁴Kamei rui tingkauh lev kandih ta sakhi khang kaw e, kamei rui kamei guay ta latzan swmei ta zauh khang kaw e.

⁵Kamei rui sa e, “Lwmnuhmei amei nunc tei, khaengna ai lev latdyng sw kanmei nunc tei, akhou guang kaduai o.”

⁶Ravguangc hei nchumhmei e, kamei hei latzanpouc e twmei tingpuk rui kauc ndauh e.

⁷“Nking o, amei nunc, ai sa puni; Isaraelle, ai nangniw ruc khou sa puni. Ai hei Ravguangc e, nangniw Racguangc e.

⁸Nangniw tuang khaengmei, nangniw phungc guang bammei rawna khaengmei zaeng tei rui ai nangniw ta luh mak ge.

⁹Kum sini nangniw tuang guaihkuanc khou rui guaichic nunc, ziuh pang khou rui ziuchic nunc katmei ta akhang kage maek ge.

¹⁰Nwmbangc khou naimei khouringc guay hei, chyngbut aching aching khou naimei kiruai guay hei atuang e.

¹¹Nwmbangc nruayna guay hei, ramvpuk khou naimei khouringc guay hei atuang e.

¹²“Ai ndaapc sini, nangniw khou ney bam lak ge, kandih khatni mi khou naimei kaguayna hei atuang e.

¹³Ai guaih zanc tei tu bu cho? lauziu zei tei zangv bu cho?

¹⁴Nangniw thuanckumei tei rui Ravguangc khang khaeng o, nangniw rui nrianhlou kanmei guay tei Ngamparymeipu khou taanc nthuih pat ro.

¹⁵Ryanramei ganv khou ata kaw o; ai rui kanlou pwkhou, nangniw ata thuanc puni!”

¹⁶Tiki Ravguangc rui meicsimei khou sa e, “Nang tabui swna alatdanv guay sa bam tu cho?

¹⁷Ai rui nang ta sw ntwnlou khang nang nuh mak ge; nang alatdanv guay laa mak ge.

¹⁸Nang hei nang rui ariwmei kaihouhmei guay ta duangda sw e, nang ramhkhangh ramhluh taanv taanhmei nunc ta duang sw e.

¹⁹“Simei lat sa khang nang kaganv thuic chamdaanv e; saraamc sa khang nang rouh mak ge.

²⁰Nang chana kahak nunc khang khuay nkhamlou khang, kaniw khuay phu khang nang chamdaanv bam e.

²¹Mi guay hei nang taanc the, kum sini ai ramhkhat sini sa mak ge, kum tiki ai hei nang kumhmei de twna nang ning e. Tiki ntaw ai nang ta luh puni the, nang khuay guay nang hu khou lamclou puni the.

²²“Ata thouh sw makmei nang, mi hei nking o; hamh e thei ai nang ta swmutlou puni, nang ta kanlou nimei nai dat lak khe.

²³Thuanckumei hei ata ngamziw swna khaengmei tuang e, alat piumei guay ta ai rui kanlou puni.”