Read Rongmei Naga KALUMLU 55 Bible Online

KALUMLU 55 - Rongmei Naga bible

KALUMLU 55

¹He Ravguangc, ai huayneymei chulou o, ai huaycha bammei khou rui karih ntheihlou rio!

²Ai rui sa bammei hei nkinglou o, kumna dawlou o; alung ryanramei rui nsuan the.

³Ata zauczihmei nunc rui kadung bammei rui ai ping the, meicsimei nunc rui ata ruatpuat the, kaniw rui ata tiryanra the, kaniw rui ata lunghpuamc e khatni karaeng e.

⁴Alung ryanra the; theihmei ta pingmei rui aruc khou sim key the.

⁵Ping kadanmei rui ata run bin the; ping kasicmei rui ata gum bin the.

⁶Ai hei akhouhna kumc aswkaeng nai khwan e thei, samc tatna zaeng nthaekc ni tuang e.

⁷Ngguay, samc tatna tazikramv thangc lungc tat kan ni tuang e.

⁸Kanuaih katungh bammei pwan, pwanzingh khou rui ai dup tat kan ni tuang e.

⁹He RINGHPOUC, meicsimei nunc lat tikaguakclou o! Kalam thu kaidai khou tei abay adapmei khatni agay agimei ai how e.

¹⁰Kaniw zingbangc kalaanv rikna raengh tat nkuayna, kaidai lungc khou tei swluai swtiatmei, khatni katuakc katitmei tipadik the.

¹¹Kabamv kathuic khou sw kasic karouhlou ngam the; chaengdai guay khou rai riumei lev meic guatmei rui padik the.

¹²Ata nuic bammei hei zauczihmei khwan e thei, ai hei tei akhangv ngam kan ni tuang e; aruc khou kagaengh sw bammei hei ata zauczihmei khwan e thei, ai kakhou rui nkamh ngam kan ni tuang e.

¹³Tiki mi hei aduang, khatni nduangh dianghmei apam nang rui e.

¹⁴Aney khat khat ta madiatna kachuc bam khwan e, Ravkai khou kalum kariu bam khwan e.

¹⁵Ata zauczihmei nunc hei kaniw panty tangh makna theic kan diu! Kaniw nringh taruaih key kan diu! Kaniw kai khou khatni kaniw lungc khou simei nai e.

¹⁶Ata nkhavlou khang RINGHPOUC Ravguangc ta kaw e, kamei rui ata kanlou puni.

¹⁷Lauthwan, kalaanv, zingbangc kahuic kasingna huayney bam puni, kamei akhwan chulou puni.

¹⁸Heizumei zauczihmei ta adowmei ric bamv guay khou rui kabiu kabaeng makna kamei rui ata phungc guanglou dat puni.

¹⁹Nganv makmei thangc rui guangh swna sin bammei Ravguangc rui akhwan chulou puni, kaniw ta ngamlou puni. Kalam thu kaniw kheiliak kalaih mak ge, kaniw Ravguangc ta ping mak ge.

²⁰Atuang reynungc pam rui kapam nunc ta adow the; kalatdyng guay swbak the.

²¹Kabaley thauh suangc ani e, tiki kalung khou karaengmei nai e. Kalat tei thauh kumc mbuaih e, tiki ntukmei baengsaeng kumc e.

²²Nang tuang puatrith guay RINGHPOUC khou lou o, kum e thei kamei rui phungclou puni. Kamei rui lungning nthanpui mei ta khat sini zaw tisilou lak ge.

²³Tiki, he Ravguangc, nang rui meicdowmei nunc khatni saraamhmei nunc ta kaniw panty kapaek sini ringc tangh mak khou rui, tarou khou tikey puni. Tiki ai thu nang khou lwmlou ni.