Read Rongmei Naga KALUMLU 56 Bible Online

KALUMLU 56 - Rongmei Naga bible

KALUMLU 56

¹ He Ravguangc, ata zauc nzianlou o, kalam thu ata adow bam e; ata zauczihmei rui ata kaganv thuic tiryanra bam e.

²Ata zauczihmei nunc rui ata adow zingc zingc bam e. Ata adowmei hei geic the.

³He Ngamparymei RINGHPOUC, Ai ping pwkhou, nang khou lwmlou e.

⁴Ai Ravguangc khou lwm e, kumna ping mak ge; kalatdyng khang tei rui ai kata thuanc e. Maansei rui akhou tabui sw ngam nina cho?

⁵Ata zauczihmei nunc rui ata tiryanra zingc zingc bam e; ata sw kasic nuhmei raeng rana raengc bam e!

⁶Kaniw guang kaduaina nchwan the, ata swluai khang rikna, achaeng kaamv guay zauc the.

⁷He Ravguangc, kaniw taanv simei khang rui, kaniw ta dandi tiilou o; nang lungpuam khou zaw tisilou o.

⁸Ai hei adih ryanra bam cho twmei nang thay e; amikdui ta nang chaklou bam e. Mi guay tei nang latrikzy khou hylou bam tu hamhna cho?

⁹Ai nang ta nkhavlou khang kawpui nungc, ata zauczihmei nunc ta alay ganclou puni. Mi hei rui RINGHPOUC abiak liangc bam e twmei ai thay e.

¹⁰Ai RINGHPOUC tuang kalatdyng khou thuanc bammeipu e.

¹¹Kakhou ai lwm e; kumna ai ping lak ge. Maansei rui ata tabui sw ngam nina cho?

¹²He Ravguangc, ai rui nrianhloumei tei ai nang khang tii ni; ai nang khang thuanckumei puatkat tii ni,

¹³nang rui ata theihmei khou rui kanlou the, zawsimei khou rui tiduaklou the. Ravguangc mav khou bam ni, ringhmei nunc khou tigaancloumei riw khou tat ni.