Read Rongmei Naga KALUMLU 59 Bible Online

KALUMLU 59 - Rongmei Naga bible

KALUMLU 59

¹ He Ravguangc, ata zauczihmei nunc khou rui kanlou o; ata adowmei nunc khou rui gaeklou o!

²Meicgay makmei nunc khou rui ata kanlou o; meicdowmei nunc khou tei rui ata kan duaklou o!

³Kaniw ata swluai khang nchwan bam e; meic nzimei nunc ata sw khang guang kaduai the. Mi hei apaap khatni ai rui taanc maanvloumei zaeng rui hamh e;

⁴kaniw ata sw khang chadina pak bammei hei akhuay zaeng rui hamh e, he RINGHPOUC.

⁵He Ngamparymei Racguangc RINGHPOUC, nang Isarael Racguangc e. Ravmaengc kalummei zaat ti hei dandi tiilou o; sina swmei nunc khou tei zauc nzianlou dat ri tho.

⁶Kaniw zingbangc guangna si nunc kumcna ninna kaidai khou ruan bam e.

⁷Kaniw rui tizakmei khatni kapinmei hei nkinglou o. Kaniw baley baengsaeng kumc e, tiki kaniw rui sa bammei tei meic chu mak ge twna ning e.

⁸Tiki, he RINGHPOUC, nang kaniw ta nuic e; ravmaengc kalummei nunc ta tei nang nuic e.

⁹Ai nang pumtan khou lwm kakh kak ge; nang hei ai duppui bamv e, he Ravguangc.

¹⁰ARacguangc rui ata nzian e khatni akhou guang puni; ata zauczihmei nunc ta ngamloumei ta kamei rui akhou tihowlou puni.

¹¹Kaniw ta swluailou rio, he Ravguangc; amei nunc amuc puni. Nang pumtan rui kaniw ta nthau phaklou o, kaniw ta zaw tisilou o, he RINGHPOUC, aniw ta gaekloumeipu.

¹²Kaniw mwang tuang paap guay, kaniw baley khou rui patmei paapc latsav guay zaeng rui, kaniw daihriw sw bammei khou tei amaan kan diu!

¹³Nang lungpuam khou kaniw ta swmutlou o; kaniw ta swmaan mutsutlou o. Kum pwkhou Ravguangc hei Isarael ta sin bammeipu e, kamei rui kandih kapwm ta sin bam e twmei meic kathuic thay puni.

¹⁴Ata zauczihmei nunc zingbangc guang datna, si nunc kumcna ninna kaidai lungc khou nkuay bam e;

¹⁵kataek phuna ruan tat bammei, kabung padik makna rah bammei, si nunc kumcna ruan bam e.

¹⁶Tiki ai suan ni nang pumtan racna; taek makmei nang ramzian tei, lauthwan pum ai suan ranvna suan ni. Nang hei ai duploupui bamv, ai ryanra khou duppui bamv sw guang the.

¹⁷Ai nang ta thuanc ni, ata gaekloumeipu ta thuanc ni. Ai duppui bamv hei Ravguangc e; ata nzianmei Racguangc hei e.