Read Rongmei Naga KALUMLU 62 Bible Online

KALUMLU 62 - Rongmei Naga bible

KALUMLU 62

¹Ravguangc rui ata kanloumei ta ai nkhwan bam e. Ai kakhou na ngangvlou e.

²Kamei na rui ata gaeklou e khatni kanlou e, kamei ata gaekloumeipu e, ata zaw tisilou zat lak ge.

³Bow kan nimei raengc kumhmei ata nangniw asaanh adow bam nina cho?

⁴Champouhmei kabamv khou rui nangniw kata swkey nii e; nangniw saraamc nii e, nangniw mwang rui suaihiamlou e; nangniw lung khou kata siang e.

⁵Ai Ravguangc khou na ngangvlou e; ai kakhou na lwm e.

⁶Kamei na rui ata gaeklou e khatni kanlou e; kamei ata gaekloumeipu e, ata zaw tisilou zat lak ge.

⁷Ata kanlou khang khatni azanc sw kasiclou mak khang Ravguangc khou na nai e. Kamei hei tanhmei ata gaekloumeipu e; kamei hei ai duppui bamv e.

⁸Amei nuncle, Ravguangc khou lwm bam o. Nangniw ryanra guay kakhou poulou o; kamei aniu duploupui bamv e.

⁹Maansei katana meicthiu na kumh tuang de; daihmei ni nthyammei ni nchamcna karaeng de. Kaniw ta duh khou nthau pwkhou, kaniw rith maek ge, kaniw hei meicthiu suangc sini nthaan e.

¹⁰Meicngam meicliammei taanv khou nangniw lwm riu; nuam laana ramh gaeng pwng e twna ning rio; nangniw lanv mbu thau bam sini, mi khou tei ngangvlou riu.

¹¹Ngamv hei katuang e twmei Ravguangc rui samei ai mpeyna chu the,

¹²khatni katuang taek makmei ramzian. He RINGHPOUC, nang kahak rui meic kathuicna khang kataanv taanv thei layna kaphy tii e.