Read Rongmei Naga KALUMLU 65 Bible Online

KALUMLU 65 - Rongmei Naga bible

KALUMLU 65

¹He Ravguangc, nang ta Zaion khou thuanhmei khatni aniw latdyng guay nang khou aniw latryan guay ngaekmei hei aniw thouc e.

²Kalam thu nang rui aniw huayneymei dawlou the. Maansei guayna kaniw paap zaeng rui nang khou guang puni.

³Aniw khuay guay rui aniw ta ngam the; tiki nang rui mi guay tei kuaklou the.

⁴Nang rui kapahloumei nunc tei, nang tuang ravkai khou bam khang nang rui phungc guangloumei nunc tei sangaymei nunc e. Nang kai khou naimei gaymei guay, nang tuang nthanmei Ravkai tuang suaihiam guay rui aniw ta tipianlou puni.

⁵Nang rui aniw khou dawlou the, aniw khou rihngammei tiilou the, aniw ta kanlou khang nang rui charynmei taanv taanclou the. Kandih kapwm rui khatni duipui paengc thangc bammei rui ni nang khou lwm e.

⁶Daihmei nang ngamv lyanna, nang rui chyngbut guay ta kabamv khou nang pumtan rui lou the.

⁷Kachin karo bammei duipui dui luat khwan guay ta nang rui khaam rimlou the. Zaatc nunc karo bammei ta nang rui tirimlou the.

⁸Nang rui taancloumei taanv daihmei ta tei pingna kandih kapwm ding e. Nang taanv paan rui kandih tin tou nganvna neihlana kauc e.

⁹Nang rui mi kandic ti hei kadanna ting dui tiilouna kandih tigaylou e. Nang rui duithuak guay khou dui tipadiklou e; nang rui kandih khang kathai ti-nthailou e. Mi hei nang rui taancloumei taanv e:

¹⁰Suak nimei laupuk khou nang rui ting tiriulou e kumna kandih titianclou e; nang rui ting tiriu chunh chunlouna kandih ti-mbuaihlou e, ramh bwan tithaulou e.

¹¹Nang ramgai paan rui nap-bi ti-nthuihlou e! Nang guangloumei bamv kathuic khou mphamh mphahna nai e.

¹²Mphuaih pung guay lauziu pang rui padik ge; chyng naek guay neihlamei rui padik ge.

¹³Ramvpuk guay lauziu rui padik ge; nzaengc baek phunling rui padik ge. Ramh katana rui neihlana kaucna suan e.