Read Rongmei Naga KALUMLU 66 Bible Online

KALUMLU 66 - Rongmei Naga bible

KALUMLU 66

¹He kandihmei guay, neihlana kaucna Ravguangc ta thuanc o!

²Kazanc hym daihmei suan ndauh o; kahym thuanc daicna thuanc o!

³Ravguangc khou mi kumna sa o: “Nang taanv guay hei adih charyn cho! Nang ngamv adih daic cho; nang ta zauczihmei nunc pingna nang mav khou nkhum key e.

⁴Kandih khou maansei kathuic rui nang ta kalum e; kaniw nang ta thuancna suan e; kaniw nang zanc thuancna suan e.”

⁵Ravguangc rui taancloumei taanv guang zauclo; maansei pang khou kamei rui taancloumei charynmei taanv guay ta zauc lo.

⁶Kamei rui duipui ta ramkaengvdic tiguanhlou the; aniw pupouc nunc rui duidai khou phay rui tat kaan e; mi khou tei aniw neihla the.

⁷Kamei kapumtan rui tingsaeng dihsin e khatni zaatc guay ta kamei zauc bam e. Meic gaanv khat na sini kata liamna akhangv mak kan diu.

⁸He zaatc guay, aniw Racguangc ta thuanc o; nangniw thuanhmei chu kan diu.

⁹Kamei rui aniw ta tiringclou the; aniw ta tibowlou mak khe.

¹⁰He Ravguangc, nang rui aniw ta nchanv the; mai rui daandi ta sw nthanmei kumc, nang rui aniw ta nchanv the.

¹¹Nang rui aniw ta phah khou tikeylou the, khatni aniw bou khou nritmei puat mphunlou the.

¹²Aniw ta zauczihmei nunc ta nang rui aniw ruc khou tinii binlou the; aniw mai lev duidai khou tatlou the. Tiki ntaw thu nang rui aniw ta giuga makmei bamv khou tibamlou the.

¹³Ai nang kai khou rawna khaeng ni; ai rui nrianhlou kanmei guay nang khang kat ni.

¹⁴Nang khang tii ni twna ai ryanramei ganv khou nrianhlou kanmei tei ai nang khang tii ni.

¹⁵Ravchapaeng khou ai lauziu rawna kat ni; ai guaichic nunc khatni lauziuchic nunc khaeng ni; maikhou tingpuk tikhou tangc ni.

¹⁶Guangna nking o, he Ravguangc ta pingmeithiu! Kamei rui akhang taancloumei taanv ai nangniw khou raclou puni.

¹⁷Nkhavlou khang ai kakhou kapna huay the; kumna ai kata lu rui thuanc the.

¹⁸Ai rui apaap guay ta alung khou pamc bam ti thei, ai huayneymei RINGHPOUC chulou ni tu hamh e.

¹⁹Tiki Ravguangc rui ai huaymei chulou the; ai huayneymei kamei nkinglou the.

²⁰Ai Ravguangc ta thuanc e, kalam thu ai huayneymei kamei ganh mak ge, kamei ata taek makna nzianlou bam e.