Read Rongmei Naga KALUMLU 68 Bible Online

KALUMLU 68 - Rongmei Naga bible

KALUMLU 68

¹Ravguangc rui thauna kata zauczihmei nunc ta nthau phaklou e. Kata karaengmei nunc zawsina pak kan the.

²Maikhou ta hunc ganh kumc, kamei rui kaniw ta alay ganc the; mai hu khou khuailiu nungh kumc meicgay makmei nunc Ravguangc mav khou maan the.

³Tiki ravchaptatmei kamav khou zaenggay e khatni neihla e; kaniw zaenggay e khatni neihlana kauc e.

⁴Ravguangc khou suan o, kazanc thuancna suan o; muangh khou tuanghmeipu khang chaeng kasiamhlou o. Kazanc hei RINGHPOUC e; kamav khou neihla o!

⁵Ravguangc, katuang nthanmei Ravkai khou bammeipu hei nruna nunc ta kadan e khatni maypui nunc ta gaeklou e.

⁶Kamei rui kakai kalau maekmei nunc khang kai tiilou e, khatni kang bammei nunc ta neihlana nyngswmei khou zay patlou e. Tiki meicliammei nunc thu phuimei ramvkaengv khou lungc puni.

⁷He Ravguangc, nang rui nang mei nunc ta nduangh pat khou tei, nang tazikramv ruan kaan pat khou tei,

⁸Ravguangc mav khou, Sinai Racguangc, Isarael Racguangc mav khou kandih kadunh e, khatni tingpuk rui ting bun key e.

⁹Nang rui ting chunh chunna tiriulou e, kumna lakmei nang tuang kandic tei chaengh tiringclou e.

¹⁰Nang mei nunc mi khou tei lungc the; nang ramgai paan rui lungcsimei nunc khang gaymei tiilou the.

¹¹RINGHPOUC rui latdanv tiipat the; kumna ntumei mpeyna rui chamv tei phungc tat the:

¹²“Guangh nunc khatni kaniw ricmei nunc pak tat kan the!” Rih khou rui laaguangmei guay tei kai khou bammei ntumei nunc rui nzanh the:

¹³Kaswkaeng guay nthanmei kachaekc rui, karangmei daandi rui duam liammei aphyna maengc guay tei nzanh the. (Tabui swna rih adow bam khou nangniw gaanvsaekc lauziu kuanc khou bam bam tu cho?)

¹⁴Ngamparymei Racguangc rui Zalmon Chyng tuang guangc nunc ta alay phak khou, kamei rui mi khou tei gunh tikeylou e.

¹⁵Chyng twan kauhmei mpeyna naimei Bashan chyngbut hei adih tanhmei chingcbut cho!

¹⁶Ravguangc kamei bamlou khang kadahloumei chingcbut ta tabui swna tancbauhmei nang chyng twan khou rui malana zauc key bam tu cho? RINGHPOUC mi khou tei tingsaeng bam puni!

¹⁷Katuang tancbauhmei rih takuanc gari ching ching ta nduanghna RINGHPOUC Sinai khou rui nthanmei bamv khou gut re.

¹⁸Bangcloumei mpeyna ta nduanghna kamei kauh khou ku the; rihthaumei nunc khou rui kamei kaipat laa the. RINGHPOUC Ravguangc mi khou tei lungc bam puni.

¹⁹RINGHPOUC tingmik pum aniu puatrith phungcloumeipu ta thuanc o. Kamei hei aniu ta kanloumei Racguangc e.

²⁰Aniu Racguangc hei kanloumei Racguangc e; Kamei hei RINGHPOUC, aniu RINGHPOUC aniu ta theic nimei khou rui kan patloumeipu e.

²¹Ravguangc rui kata zauczihmei nunc, kaniw tuang paapc panty khou rui rei pat makna bammei nunc py tei swpiaklou the.

²²RINGHPOUC rui sa e, “Ai rui nangniw ta zauczihmei nunc ta Bashan khou rui phungc guang dat puni; ai rui kaniw ta duipui syng khou rui laa pat dat puni.

²³Nangniw kaniw zei khou ruan tat puni, khatni nangniw si nunc rui kaniw zei aliakc nii saanv aliakc puni.”

²⁴He Ravguangc, nang rihngamna ruan gutmei ta meic guay how e, aRacguangc, aguangc nthanmei karakai khou ruan gutmei ta how e.

²⁵Lu suanmei nunc hu khou, nkhuangh baza sinmei nunc kathei khou, kachung khou tunac nunc syamtuaic khuangc hiwna gut re.

²⁶“Jakob kikta nangniw guay, RINGHPOUC ta thuanc o; kamei nunc kariumei bamv khou, Ravguangc ta thuanc o!”

²⁷Hu liang khou nthyam liangmei Benjamin kaikhwang, mi tangv Juda tuang kapy nunc, Zebulun khatni Naptali tuang kapy nunc kathei lwanna gut the.

²⁸He Ravguangc, nang rui kahu nungc taanclou kanmei kumcna nang ngamv lyanlou o.

²⁹Jerusalem khou naimei nang tuang Ravkai zaeng rui, guangh nunc rui nang khang kaipat phungc guang e.

³⁰Zaengv ding khou bammei nwmbangc khouringc Izip ta luhlou o; zaatc nunc ta luhlou o, guaihnac pang nduanghmei guaichic pang ta tei luhlou o. Kaniw nkhum keyna kaniw tuang daandi nang khou katlou kan diu. Rih sw niimei nunc ta tei hac phaklou o!

³¹Izip khou rui dihkhyn nunc guang puni; Sudanmei nunc rui Ravguangc khou kaniw baanc zay thauna huayney puni.

³²Ravguangc khou suan o, he kandi tuang guangdih nunc, RINGHPOUC ta thuanhpui lu suan o.

³³Reynungc tingpuk khou tuangc bammeipu RINGHPOUC ta thuancna suan o. Kakhwan ganh keymei khwan tei nking o.

³⁴Ravguangc ngamv kauc ndauh o; Katik kahym Isarael khou nai e, kapumtan tingpuk kauh khou nai e.

³⁵Isaraelmei Racguangc hei katuang ravkai khou rui tat pat pwkhou adih meic pingmei lwn cho! Kamei rui kamei nunc khou baantan pumtan tiilou e. Ravguangc ta thuanc o!