Read Rongmei Naga KALUMLU 69 Bible Online

KALUMLU 69 - Rongmei Naga bible

KALUMLU 69

¹He Ravguangc, ata kanloumeipu! Dui rui aguang thum tangc puni the.

²Ai hei nthukmei bih khunc khou mphumh key the; aphay dingloupui bamv maek khe; ai hei nthukmei dui laa khou bam the. Dui rui ata liak bin puni the.

³Ai kauc liat lak guang the, aruak mwan ngam the. Nang rui nkhavloumei ta phaengcna amik how mak guang the.

⁴Kalam maekna ata karaengmei nunc apy sam suangc geic the. Ata zauczihmei nunc rui aruc khou saraamcna sa e; kaniw tanc e khatni ata swluai khang rik the. Ai houh makmei puat tei kaniw rui ata tikhangc the.

⁵He Ravguangc, apaap guay nang thay e; ai adih mpang cho twmei nang thay e.

⁶Nang khou lwmloumei nunc ta azaeng rui tizaklou rio, he ngamv guay RINGHPOUC Ngamparymeipu! Nang ta kalummei nunc ta azaeng rui zaw tisilou rio, he Isarael Racguangc!

⁷Ai zak khaengv bammei hei, zakmei rui ata duamliam bammei hei, nang zaeng khang rui e.

⁸Ai hei achana nunc khou gin kumc the, akai kaikhunc khou zaatc baihmei kumc the.

⁹Nang tuang Ravkai khang lungh suhmei hei akhou mai chuangh kumc bam e. Nang ta tizak bammei hei ata tizak bam tuang e.

¹⁰Munthiangcna ai niamh key pwkhou meic nunc rui ata nsic e;

¹¹ai zaengsiphey piu pwkhou, kaniw ata nuic e.

¹²Kaniw alam khou chaengdai chaengdai khou rac e, zouh mbamei nunc rui alam khou lu suan e.

¹³Tiki, he RINGHPOUC, ai thu nang khou huayney ni; he Ravguangc, nang rui nuhloumei ganv khou dawlou o. Nang ramzian daihmei paan rui ai neymei dawlou o. Kalam thu kanlou khang nrianhloumei nang latdyng tei nang ngaek ge.

¹⁴Bih khou kalimh key nimei khou rui ata kanlou o; ata zauczihmei nunc khou rui ata kanduaklou o; nthukmei dui khou rui ata kanduaklou o.

¹⁵Duidai tei rui tiliakbinlou rio, duisyng khou ata tiliakbinlou rio, taruaih khou ata ti-mphumhlou rio.

¹⁶He RINGHPOUC, taek makna nang rui nzian bammei paan rui, ai huayneymei chulou o; nang zauzian daihmei paan rui akhou karih guanglou o!

¹⁷Nang bangc khou rui nang nkamhlou rio; ai ryanra sih bam e, ntaw dawlou o!

¹⁸Guangna ata kanlou o; ata zauczihmei nunc khou rui ata gulou o.

¹⁹Ata adih nsic bam tu cho, adih ata mala bam tu cho khatni tizak bam tu cho twmei nang thay e. Ata zauczihmei guay ta nang how e.

²⁰Nsicmei rui alung kabiu the, amachunc ni maek khe. Ata nzianlou khang rigwnna khwan e, tiki gaanv khat na rui sini nzianlou mak ge; swmloumei ta rigwn e, tiki gaanv khat na rui sini swmlou mak ge.

²¹Ai ndaapc pwkhou, kaniw rui akhang khay tii the; ai tari pwkhou kaniw rui akhang khianghmei dui tii the.

²²Kaniw khumngai guay rui kaniw ta sw kasic kan diu; kaniw tuang khaengmei taektw guay rui kaniw ta kasic kan diu.

²³How mak khang kaniw mik titiatlou o! Kaniw sian tingsaeng tisuankeylou o!

²⁴Nang lungpuam kaniw ruc khou bun keylou o; nang lungpuam dai kaniw ta nthau tangclou o.

²⁵Kaniw lung bamv ganc tazik chik lou diu; kaniw gaanv khat na ta sini kaniw tuang pheykai khou ringcna ganclou duh mak kan diu.

²⁶Nang rui dandi tiiloumei nunc ta kaniw rai nkuanlou e, nang rui sw zamhloumei nunc ramrianra tei kaniw rac e.

²⁷Kaniw paap guay hylou o; kaniw ta kanlou rio.

²⁸Kaniw zanc ringhmei latrik khou rui thut maanlou diu; nang mei nunc zanc hyloumei pang khou tei kaniw kazauh mak kan diu.

²⁹Tiki ai hei ryanra the khatni machunhmei maek khe; ata zay thaulou o, he Ravguangc; ata kanlou o!

³⁰Ai lu suanna Ravguangc ta thuanc ni; kata thuanckuna kahym kauc ndauh ni.

³¹Kakhang khouringh katmei suangc, guaichic daihmei khaengmei suangc, mi rui RINGHPOUC ta tipian mbu puni.

³²Ryanra ryanriumei nunc mi hei howna neihla puni; Ravguangc ta kalummei nunc ta mi rui katiu thaulou puni.

³³Lungcthuy lakmei khwan RINGHPOUC rui chulou e; kangkai khou bammei kamei nunc ta amuclou mak ge.

³⁴Ravguangc ta thuanc o; he tingkauh lev kandih, duipui guay khatni mi khou bammei khouringh katana, Ravguangc ta thuanc o.

³⁵Kamei rui Jerusalem ta kanlou puni khatni Juda kaidai guay kasiamh thau dat puni. Kamei nunc mi khou tei bam puni khatni mi kandic hei kaniw tuang sw puni.

³⁶Kabangc nunc kikta guay rui mi hei laa puni, khatni kata nzianmei nunc mi khou tei lungc bam puni.