Read Rongmei Naga KALUMLU 71 Bible Online

KALUMLU 71 - Rongmei Naga bible

KALUMLU 71

¹He RINGHPOUC, nang khou ai duplou e; tabui nungc na sini ata zaw tisilou rio!

²Nang thu nchumhmei e, ata nkhavlou o, khatni gulou o. Ai huayneymei nkinglou o, kumna ata kanlou o!

³Nang hei akhang duploupui bamv taudaic e, khatni gaekloumei tanhmei rihgaekkai swlou o. Nang hei akhang taudaic khatni rihgaekkai e.

⁴He aRacguangc, meicsimei nunc khou rui ata gulou o, nzian thay makmei khatni meic guatmei nunc baanc khou rui gulou o.

⁵He RINGHPOUC, nang khou ai lwm gay e; ai chabwan douc rui nang khou lwm guang the.

⁶Apanty kaguay nang khou ngangvlou the; ata puanclou rap nungc tei rui, nang rui ata gaeklou the. Ai kaganv thuic nang ta thuanc ni.

⁷Apanty hei meic mpeyna khang matat nuhmei e; kalam thu nang hei akhang tanhmei rihgaekpouc swguang the.

⁸Neihmaryn ai nang ta thuanc e, nang hym kauc ndauh e.

⁹Ai karacpouc key pwkhou ata ganclou rio; apumtan suan key pwkhou ata ganclou rio.

¹⁰Ata zauczihmei nunc rui ata swluai niina bam e, kaniw ata sw kasic khang kaphianh bam e.

¹¹“Ravguangc rui kata ganclou the; kata nthauna nym di kho, kata gulou nimei maek khe,” twna kaniw sa bam e.

¹²Akhou rui duc tatlou rio, he Ravguangc; aRacguangc, ata nkhavlou khang katumclou o!

¹³Ata adow bammei nunc ta zaw tisilouna swmut sutlou o. Ata sw kasic khang sw bammei nunc tei zak kan diu khatni zawsi kan diu.

¹⁴Ai kaganv thuic nang khou lwm gay bam ni; ai nang ta thuanc bam ni.

¹⁵Nang ramgai ta ai rac ni; nang rui kanloumei tei thay ngammei suangc geic bam sini, ai rac zingc bam ni.

¹⁶Ai nang ngamv ta thuanc ni, he Daic liangmei RINGHPOUC! Nang ramgai ai kauc ndauh ni, nang ramgai na ta thuanc ni.

¹⁷Ai chabwan khou rui thauna nang rui ata nchamlou the, nang tuang charynmei taanv guay tei ntaw ni ai rac bam e.

¹⁸Ntaw hei ai karacpouc di the, apy puangc the; ata ganclou rio, he Ravguangc! Tiki ata bam nduanghlou o, guang nimei kin guay khou nang ngamv khatni nang baantan ai kauc ndauh mak saanv.

¹⁹He Ravguangc, nang nchumhmei hei tingpuk kauh tangc e. Nang rui taanvdaih taanclou the; nang kumhmei baihmei maek ge.

²⁰Ryanra ryanriumei khatni sucnumei azuh nang rui akhou tii guang the, tiki nang rui apumtan tiilou dat puni; nang rui ata tarou khou rui kanlou puni.

²¹Nang rui ata tidaiclou zat makmei ramdai tidaiclou puni; nang rui ata swmlou dat puni.

²²Ai kachangcna nrah rui nang ta thuanc ni; he Ravguangc, nang lat suai makna taancloumei taanv tei ai thuanc ni. Atuang nrac rui ai thuanh lu suan ni. Isarael tuang nthanmeipu, nang khou suan ni.

²³Ai neihlana kauc ni, nrah downa neihlana kauc ni; ai alung kapwm rui suan ni, nang rui ata kanlou the.

²⁴Nang tuang nchumhmei ai rac zingc bam ni. Kalam thu ata sw kasic khang karamc bammei nunc ta tei ngamlou the khatni zaw tisilou the.