Read Rongmei Naga KALUMLU 72 Bible Online

KALUMLU 72 - Rongmei Naga bible

KALUMLU 72

¹Guangh rui nchumhna dihsin khang, he Ravguangh; nang tuang nchumhmei tei tamzanh pat ngam khang,

²lungcsi ryanramei nunc ta ravchap ntwnna sin khang, nang tuang mei guay ta nchumhna sin ngam khang nchamlou o.

³Chyngbut guay rui meic nunc khang lungcgay chingkhiuhmei phungc guang kan diu, luanghbut guay rui ravchaptatmei thai nthai diu.

⁴Guangh rui lungcsimei khang nchumhna latzan swlou diu; kamei rui lungc thuy lakmei nunc ta nkhavlou diu khatni kaniw ta sintu bammei nunc ta zaw tisilou diu.

⁵Bw neih gaanc bam saanv, meickin kathuicna khou, nang mei nunc nang ta kalum bam diu.

⁶Guangh hei laupuk khou riu keymei chapuak ting kumc, kandih khou riu chunh chun keymei ting kumc kan diu.

⁷Kapanty khou ravchaptatmei padik thau kan diu, bw nai bam saanv lungc chingkhiuh bam kan diu.

⁸Kaguangcdic duipui khou rui duipui akhat nganv, Euphretis duithuak khou rui kandih tin nganv daic tangc kan diu.

⁹Tazikramv khou lungc bammei zaatc nunc rui kamav khou nkhum key puni; kata zauczihmei nunc kandih khou pun nkhum key puni.

¹⁰Spain khatni pwkak guay tuang guangc nunc rui kakhou kaipat kat puni; Arabia khatni Ethiopia guangc nunc rui kakhou puatkat phungc guang puni.

¹¹Guangh guay kamav khou nkhum key puni; zaatc guay kasiamruai sw puni.

¹²Nkhavlou khang kata kauhmei lungcsimei nunc, lungc thuy lakmei nunc khatni kadanloumei maekmei nunc ta kamei rui kadanlou puni.

¹³Suanmei khatni lungcsimei ta kamei lungh suclou puni; lungcsimei nunc panty kamei rui kanlou puni.

¹⁴Kamei rui kaniw ta rairiumei, sw kasic karouc nimei khou rui kanduaklou puni; kaniw panty hei kakhang kunghmei e.

¹⁵Guangh panty lungsingna lungc diu! Kakhang Arabia thangc rui kachaekc tii diu; kakhang rui kaganv thuic huayneylou bam diu; Ravguangc suaihiam karuc khou nai tanh tan bam diu.

¹⁶Mi kandih khou hei nap-bi mphamh mphahna nai diu; chyngbut guay phunling rui padik diu; Lebanon khou kumc kathai nthai geic diu. Laupuk khou pucbwan thau chuy kumc kaidai guay khou maansei padik diu.

¹⁷Guangh zanc hei amuc dat zat mak kan diu; kazanc tatmei hei neihmik nai saanv nai bam kan diu. Meic nunc kapaan rui suaihiam laa diu, zaatc guay rui kata sangaymeipu twna kaw diu.

¹⁸RINGHPOUC ta thuanc o, Isarael Racguangc ta thuanc o! Kamei na rui mi charynmei taanv guay hei taanclou e.

¹⁹Hymdaihmei kazanc hei tingsaeng thuanc o! Kahym kandih kapwm padik diu. Amen! Amen!

²⁰Mi hei Jessi nac mpouh David tuang ravsuai luailoumei the.