Read Rongmei Naga KALUMLU 73 Bible Online

KALUMLU 73 - Rongmei Naga bible

KALUMLU 73

¹Ravguangc hei Isaraelmei khang gay changh e; kalung nthanmei nunc khang gay changh e.

²Tiki ai Ravguangc ta lwm gay taan changh ni kumclou khwan the; ai kata lwm taan ni kumclou khwan the.

³Kalam thu daihriw swmei meicsimei nunc lungcgay bammei ta how pwkhou, kaniw ta ai mamav khwan e.

⁴Kaniw sucnu tuang maek ge; kaniw pumc tanc e, kaniw pumc gay e.

⁵Meic liammei kumcna kaniw ryanramei ariw mak ge; meic baihmei kumcna kaniw khou katuakcmei ariw mak ge.

⁶Kumna kaniw gaengh swmei rui ntuh alei kumcna alei e; meicngam meicliammei taanv rui pheybaan piu kumc piu e.

⁷Kaniw lungc khou rui simei bun pat re, kaniw lungning kheihsimei raeng rui tynna bam e.

⁸Kaniw meickai ta nuic e, sw kasic khang sa e; kaniw daihriw sw e khatni meickaita sintu khang kakhanh e.

⁹Tingkauh Racguangc ta kaniw thouh sw makna sa e, kandih maansei ta ni ngam sam na latdanv tii e;

¹⁰Ravguangh mei nunc nganvna lunghgutna nkingna; kaniw rui sa samei tei lwmlou rap khang e.

¹¹“Ravguangc thay ni tu hamh e: Kauh Liangmeipu thay bam ni tu hamh e,” twna kaniw rui sa e.

¹²Meicsimei nunc kiu hei tei kumc the, kaniw khang mphamh mphahna nai e, nai geic hay hay e.

¹³Kum e thei, ai lungning nthanna lungc bammei hei, paapc taanh makna lungc bammei hei nsa dina cho?

¹⁴He Ravguangc, nang rui ata neihmaryn tiryanralou the; lauthwan kathuic nang rui ata dandi tii the.

¹⁵Ai rui mi kumna lat guay hei sa bam khwan e thei, ai hei nang mei akhat kumcna sw bam lak ni tuang e.

¹⁶Mi kunghmei lam guay hei kabah thay khang ai kakhanh khwan e; tiki kabah thayngam mak khwan e;

¹⁷ai nang tuang Ravkai khou guang mak saanv; ntaw thu meicgay makmei nunc khou tabui pat puni cho twmei ai thay the.

¹⁸Nang rui kaniw ta animei bamv khou lou puni khatni kaniw ta tibow kamut kamailou puni!

¹⁹Kaniw ta kadyng khou swmutlou the; ping kasicna kaniw mutlou the.

²⁰Kaniw hei tinggaanc pwkhou maan kanmei mang kumhmei na de. He RINGHPOUC, nang thau pwkhou kaniw maan kan the.

²¹Alung hei nkhuc pwkhou, alung kabiu pwkhou,

²²ai hei nang khang khouringh kumc mpang the.

²³Tiki ai kaganv thuic nang khou bam ana bam e, kumna nang rui abaanc zaylou e.

²⁴Nang tuang latdyn rui ata zaylou e, nkhamh khou champouhna nang ata laalou puni.

²⁵Nang hamhna akhang tingkauh thangc tabui naina cho? Ai nang ta laatow the, kandih khou tabui ta kahaw dat khang nai hena cho?

²⁶Alung khatni apumc hei suan key nuh e, tiki Ravguangc hei apumtan e; akhang kage naimei kapwm kiu kamei hei e.

²⁷Nang ta mpatloumei guay suai makna maan puni; nang khou lwmlou nuh makmei guay ta nang rui swmut puni.

²⁸Tiki akhang thu, Ravguangc daeng ana bammei hei adih gay cho, Ngamv Kauh Liangmei RINGHPOUC khou duploumei, kamei rui taancloumei guay ta kauc ndauhmei hei adih gay cho!