Read Rongmei Naga KALUMLU 74 Bible Online

KALUMLU 74 - Rongmei Naga bible

KALUMLU 74

¹Tabui swna nang aniw ta mi kumna mpatlou tu cho, he Ravguangc? Nang mei nunc ta tingsaeng lunghpuamc bam nina cho?

²Nang mei khang reynungc rui nang rui kapah patloumei, nang tuang zaat sw khang bangh sw bammei khou rui nduangh patloumei nang mei nunc ta ningtowlou o. Nang bamloumei Zaion Chyng ta ningtowlou o.

³Swbau swra ngamna ganclou bammei bamv khou, kaamc guanglou dat ro; Ravkai khou naimei guay aniw ta zauczihmei nunc rui sw kasic karouc ngam the.

⁴Nang ta zauczihmei nunc rui rihngamna nang tuang Ravkai khou kauc the. Mi khou tei kaniw rui rihngammei chuangcphey daanclou the.

⁵Hei tei thing dowmei nunc rui nrih rui ngouhbangc dwang key kumc the.

⁶Thingpaek guay kaniw ric rui khatni tandiak rui siauc ra key the.

⁷Kaniw rui nang tuang Ravkai swra key the, khatni maithoulou the. Nang ta kalummei bamv tei kaniw rui swtanac the.

⁸Kaniw rui aniw ta swpuat paruatlou nii the; mi kandic khou naimei nthanmei bamv guay kaniw rui mai thou ngam the.

⁹Aniu tuang nthanmei puat guay swmaan ngam the; muhzwng khat na sini nsaekclou dat mak khe. Mi hei asaanh kum bam nina cho twmei gaanv khat na sini thay mak khe.

¹⁰He Ravguangc, nang ta zauczihmei nunc asaanh nang ta nuic bam nina cho? Kaniw nang zanc tingsaeng nsic bam nina cho?

¹¹Tabui swna nang baanc zay rei bam tu cho? Tabui swna nang baanc baanthei taapna bam tu cho?

¹²Tiki nang hei reynungc rui aniw guangc sw guang the. He Ravguangc, nang rui aniw ta kaganv mpeyna khou kanlou guang the.

¹³Nang ngamv rui nang rui duipui sw ntamvlou the, duipui ravsic guay py dap piaklou the.

¹⁴Duipui ravsic py guay swpuat paruatlou the, kapumc tei tazikramv khouringc nunc taek tisw the.

¹⁵Nang rui duithuak tiluangclou the khatni duipuakkai tipuaklou the; duipui ta ramkiang tiguanhlou the.

¹⁶Nang rui zingbangc kalaanv damclou the; nang rui bw, neih ta kabamv kabamv khou duanclou the.

¹⁷Nang rui kandih khang kanganv damclou the, nang rui tingsei tinglwm ni damclou the.

¹⁸Tiki he RINGHPOUC, nang ta zauczihmei nunc, nang ta nuic bam the twmei ningtowlou o. Kaniw ravning mak khe, nang ta sa kasic the twmei nang ningtowlou o.

¹⁹Ngangv bamv maekmei nang mei nunc ta kaniw tuang meic nzimei zauczihmei nunc baanc khou ganclou rio; rairiu khaengv bammei nang mei nunc ta amuclou rio!

²⁰Nang aniw lev dinglou kanmei tei amuclou rio. Mi kandic tuang zinghmei kwn kathuic khou sw kasic karoucmei nai e.

²¹Meic nunc rui niibin bammei nunc ta tizaklou rio; mi lungcsi lungcsakmei nunc tei rui nang ta thuanc diu.

²²He Ravguangc, thaulou o, nang lam sa gaeklou o! Rav ta thay makmei nunc, nang ta nuic zingc zingc bam e twmei ningtowlou o.

²³Nang ta zauczihmei nunc rui lunghpuamcna kauc bammei tei amuclou rio; nang ta howmumei nunc rui taek makna kauc bammei khwan tei amuclou rio.