Read Rongmei Naga KALUMLU 76 Bible Online

KALUMLU 76 - Rongmei Naga bible

KALUMLU 76

¹Juda khou Ravguangc ta thay e, kazanc hei Isarael khou champouh e.

²Jerusalem khou kakai nai e; kamei Zaion Chyng khou bam e.

³Mi khou tei kamei rui zauczihmei tuang pailu guay riam baulou e, kaniw tuang nggic guay khatni baengsaeng guay, ngguay, kaniw tuang rih na guay swbaulou e.

⁴Nang hei adih hymdaih tu cho, he RINGHPOUC! Nang tuang zauczihmei nunc ta ngamloumei chyngbut khou rui guang khou tei, nang ngamv adih daic cho!

⁵Kaniw tuang bauhmei ricmei nunc tuang guay laa ngam kan the, ntaw thu kaniw theihmei ramzip zip kan the. Kaniw pumtan khatni kaniw ramhei guay nsa di the.

⁶He Jakob Racguangc, nang rui aniw ta luh pwkhou, takuanh nunc khatni takuanh tuanghmei nunc theic the.

⁷Tiki RINGHPOUC, nang ta meic kapwmna ping e. Nang lungpuamc pwkhou meic gaanv khat na sini, nang mav khou ding ngam mak ge.

⁸Nang rui nang latzan tingkauh thangc rui kauc pat the. Kandih hei pingna reih rei the,

⁹nii bin bammei nunc ta kanlou khang, nang rui nang tuang latzan kauc pat khang, dingthau pwkhou.

¹⁰Maansei lungpuam rui nang ta thuanhmei ti-mbulou e; rih khou rui duak patmei nunc tei neihla zaenggay puni.

¹¹RINGHPOUC Ravguangc khang nang tii ni twna nrianhloumei tei tii o; kainingmei zaatc nuncle, kakhou kaipat phungc guang o. Ravguangc rui maansei nunc ta kata tipinglou e.

¹²Kamei rui daihriw swmei guangh nac nunc ta tiliwkeylou e, guangh daihmei nunc ta tipinglou e.