Read Rongmei Naga KALUMLU 77 Bible Online

KALUMLU 77 - Rongmei Naga bible

KALUMLU 77

¹Ai kapna Ravguangc khou kauc e; ai kauc ranvna kauc e, kumna kamei rui akhou dawlou e.

²Ryanramei ganv khou ai RINGHPOUC khou huayney e; abaanc zay thauna zingbangc huayney thangc e; tiki ai kim key ngam mak khe.

³Ai Ravguangc ta kakhanh pwkhou, alung ryanra the; ai makumh pwkhou adiw si the.

⁴Kamei rui ata zingbangc tirak thangclou the; alung ryanramei rui lat sa dat ngam mak khe.

⁵Tat kanmei tingmik guay ta ai kakhanh the, reydouc tingkwm guay ta ningtow the.

⁶Zingbangc mik ngganvna kakhanh ducna kakhanh the; ai makumhna chak the:

⁷“RINGHPOUC rui aniu ta ganc suanglou puni the cho? Kamei zauc nzianlou dat pw lak khena cho?

⁸Kamei aniu ta nzian taan thena cho? Kalatdyng nai bam taan thena cho?

⁹Zauc nzianlou khang Ravguangc amuc thena cho? Zauzian phaan kalungpuam rui lyn thena cho?”

¹⁰Ata tikabiu liangmei thu Ravguangc pumtan maek khe twna ai kakhanh khou rui e.

¹¹Ai nang tuang taanv daihmei guay ta ningtow ni, he RINGHPOUC; tat kanmei ganv khou nang rui taanclou kanmei charynmei taanv guay tei ai kakhanh dat ni.

¹²Nang rui taanc kanmei taanv guay tei ai kakhanh ni; nang tuang baantan daihmei taanv guay tei ai makumh ni.

¹³Nang rui taanhmei taanv guayna hei nthan e, he Ravguangc. Rav khat na sini nang kumcna daihmei maek ge.

¹⁴Nang hei charynmei taanv taanhmei Racguangc e, nang rui nang ngamv zaatc nunc khou lyanlou the.

¹⁵Nang pumtan rui nang mei nunc ta kanlou the, Jakob khatni Josep kikta ta kanlou the.

¹⁶He Ravguangc, dui rui nang ta how pwkhou ping the, duipui syng kadunh the.

¹⁷Muangh rui ting bun key the; tingpuk khou tingthinc the, kabiak kathuic khou ting palik kachan pat the.

¹⁸Pwanzingh khou nang tuang ganh keymei khwan chu the, tingpalikmei riw rui kandih tigaanc the; kandih kadunh the khatni kachyn the.

¹⁹Nang duimuat ruc khou tat the; nang nthukmei duipui tat kaan the, tiki nang phay khunc how mak ge.

²⁰Nang rui nang mei nunc ta lauziu gaengh kumc gaengc pat the; Mousi lev Aron khou nsinlou the.