Read Rongmei Naga KALUMLU 78 Bible Online

KALUMLU 78 - Rongmei Naga bible

KALUMLU 78

¹Amei nuncle, ai rui nchamloumei hei nking o, khatni ai rui samei khou nangniw lungh gutlou o.

²Ai latkw sa puni, khatni kahunungc mbinhloumei guay tuang kabac dinclou puni.

³Ai rui chumei khatni thaymei, aniw pupouc nunc rui aniw khou racloumei guay kabac tei dinc puni.

⁴Aniw rui mi guay tei aniw nac nunc khou nkamhlou lak ge; RINGHPOUC tuang pumtan, kamei rui taanvdaih taancloumei guay tei, kamei rui taancloumei charynmei taanv guay tei guang nimei kin khou ai raclou puni.

⁵Kamei rui Isaraelmei nunc khou katuang latdyn tiilou the, khatni Jakob kikta khou latdanv tii the. kamei rui aniu pupouc nunc khou nchamlou the.

⁶Mi latdyn guay tei lungc guang nimei kin rui thay bam khang, hei tei kaniw nac nunc khou dinclou kadai bam khang e.

⁷Mi kumna lungc pwkhou kaniw ni, Ravguangc khou lwmlouna, kamei rui taanclou kanmei taanv guay tei amuc makna, kalatdanv guay piu tanh tan bam khang e.

⁸Kum pwkhou kaniw tei latliammei khatni lat piu makmei, Ravguangc khou lwmmei ntip zat makmei, khatni lwmlou nuh makmei kaniw pupouc nunc ta luih mak puni.

⁹Ephraimmei nunc, sauhpai khatni pailu sinna rihbamv khou rui pak kan the.

¹⁰Kaniw Ravguangc khou swloumei latdyng ngaek mak khe; kaniw kalatdanv piu zih the.

¹¹Kamei rui taanclou kanmei taanv tei kaniw amuc the, kaniw khou taancloumei charynmei taanv guay ta tei amuc the.

¹²Kaniw pupouc nunc hu khou, Zoan nzaengc khou, Izip ramv khou Ravguangc rui charynmei taanv mpeyna taanclou the.

¹³Kamei rui duipui tiluangc ntamvlou the, kumna kaniw ta zay kaanlou the; kamei rui dui tei ngaengsaengc kumc tidinglou the.

¹⁴Kamei rui kalaanv chaeng muangh rui, zingbangc saanvsaengh mai riw rui kaniw ta zaylou the.

¹⁵Kamei rui tazikramv khou taudaic swbaklou e, kumna kasyng thangc rui kaniw khang dui tiilou e.

¹⁶Kamei rui taudaic khou rui dui tipuak patlou the, kumna dui tei duithuak kumc tiluangclou the.

¹⁷Kum sini kaniw Ravguangc khou paapc taanc hay hay the. Kumna tazikramv khou tei kaniw Kauh Liangmeipu ta liam khwan e.

¹⁸Kaniw rui tu niimei neyna Ravguangc ta nchanv the.

¹⁹“Ravguangc rui sypungramv khou taektw tii ngam puni dina cho?

²⁰Kamei rui taudaic ta kagit tina dui puak pat re twmei nchumh e; tiki kamei aniu khang ntyan khatni kamei nunc khang zanh tii ngam puni dina cho?” twna kaniw Ravguangc ta matevna sa the.

²¹Kumna mi guay tei chu pwkhou, RINGHPOUC lunghpuamc the; kamei nunc ruc khou mai pat the, kaniw ruc khou kalungpuamc ranv ranv the.

²²Kalam thu kaniw kata lwm mak khe, kamei rui kaniw ta kanlou puni twmei lwm mak khe.

²³Tiki kamei rui tingpuk khou latdanv tii the, tingpuk kaikhamv laanc pat the;

²⁴meic nunc khang kamei rui manna tiriu key the, tingkauh thangc rui taektw tii key the

²⁵Kaniw baanchara nunc taektw tu the. Tu nii saanv tu khang Ravguangc rui tii key the.

²⁶Kamei rui neihpat pwan ta ni ti-aliu guang the, kangamv rui dihba pwan ta katiu thau the.

²⁷Kamei rui kamei nunc khang duipui syniang zu nruayna tii key the.

²⁸Hei tei kaniw tuang zypui khou pheykai guay daeng khou key padiklou the.

²⁹Kumna kaniw tuna pian the, kaniw kahawmei Ravguangc rui tiilou the.

³⁰Tiki kaniw agaamvna pian makna tu bam khou,

³¹Ravguangc rui kaniw ta lunghpuamc the, kaniw pang khou kapumc tanhmei nunc ta, Isarael tuang gay liangmei chabwan nunc ta swluai the.

³²Kum tisini meic nunc tei paapc taanc nthaekc mak ge; mi charynmei taanv guay tei taanclou bam tini sini kaniw kata lwm mak ge.

³³Kumna kamei rui kaniw panty tingmik ta nsa khou ryanra ryanriumei khou tiluailou the.

³⁴Kamei rui kaniw ta swluai ti pwkhou rui kaniw kakhou hanc guang dat khwan e; kaniw lungh laic datna, lungh gutna huayney dat the.

³⁵Ravguangc hei kaniw ta gaekloumeipu e; Ngamparymeipu hei kaniw ta thuakloumeipu e twmei kaniw ningtow dat the.

³⁶Tiki kaniw lat guay tei saraamhmei lat re; kaniw rui sw bammei tei kalingmei hamh khwan e.

³⁷Kaniw kakhou biangpiu chuyna lungh mak khwan e; kaniw rui kakhou dingloumei latdyng tei kaniw ngaek mak khwan e.

³⁸Tiki Ravguangc rui kamei nunc khou zauc nzianlou the. Kamei rui kaniw paap kuaklou the, kumna kaniw ta swmutlou mak the. Kalungpuam kaduk key dat khwan e, kareic khaam key dat dat khwan e.

³⁹Kaniw hei theic nuangc kan nimei maansei de, aliu liang louna tat kanmei pwan kumhmei na de twmei kamei thay e.

⁴⁰Sypungramv khou tei azuh katupcna kaniw kata liam kan tu cho; azuh katupcna kaniw kalung tikabiu kan tu cho!

⁴¹Kaniw Ravguangc ta nchanv dat dat khwan e, Isarael tuang nthanmeipu ta tiryanra dat dat khwan e.

⁴²Ravguangc ngamv ta khatni kaniw ta zauczihmei nunc baanc khou rui kamei rui kaniw ta kanpatloumei tingmik ta tei kaniw amuc the;

⁴³charynmei taanvdaih mpeyna taancna Izip ramv Zoan zaengc khou taanc lyanlou kanmei ta tei amuc the.

⁴⁴Kamei rui duithuak ta zei tiguanhlou the, kumna Izipmei nunc zangv khang dui maek khwan e.

⁴⁵Kamei rui kaniw pang khou, tiraimei sim pang, kaniw kandic sw kasicmei gou pang mpat guang the.

⁴⁶Kaniw tuang phunling guay tu khang, kaniw laupuk swmut khang, kamei rui nkav pang mpat guang the.

⁴⁷Kamei rui nrihthai rui kaniw tuang drakha bang guay khatni kaniw tuang tadut bang guay gunh rui swkamut kamailou the.

⁴⁸Kamei rui nrihthai rui kaniw tuang kiruai khatni kaniw tuang lauziu pang ta ganh rui sw kamut kamailou the.

⁴⁹Kamei rui kaniw ruc khou kalungpuam mpat pat the; swmutmei baanchara kang akhat tiguang the.

⁵⁰Kamei kalungpuam khaam dat mak khwan e, kumna kaniw panty nsaekclou mak khwan e. Tiki ravpyan rihpyan rui kaniw ta swluai the.

⁵¹Kamei rui Izipmei kaikhunc guay khou mpouh nareimei guay ta swluai the.

⁵²Mi tangv kamei rui kamei nunc ta lauziu gaengh kumc nduangh pat the, kaniw ta tazikramv zay kaan patlou the.

⁵³Kamei rui kaniw ta giuga makna zay kaanlou the, tiki kaniw ta zauczihmei nunc ta, duipui rui liak bin the.

⁵⁴Kamei rui kaniw ta katuang nthanmei kandic khou, kamei rui rihngamloumei chyngramv khou phungc guanglou the.

⁵⁵Kaniw guang pwkhou, Kamei rui zaatc nunc ta alay ganc the; kamei rui kaniw kandic, Isaraelmei kaikhwang guay khang nzanhlou the, kaniw kai guay tei, kamei nunc khang tiilou the.

⁵⁶Kum tisini kaniw Ngamparymei Ravguangc ta liam bam de. Kaniw kalatdanv guay piu mak ge.

⁵⁷Tiki kaniw pupouc nunc kumcna lat liam the, biang piu mak khe; nkhuaimei pailu kumc lwmnuh mak khe.

⁵⁸Kaniw rui rav baihmei ta kalumna kalung tipuamc the, kaniw tuang ravmaengc guay rui kareic tithau the.

⁵⁹Hei tei how pwkhou Ravguangc lunghpuamc the, kumna kamei rui kamei nunc ta ganc khuplou the.

⁶⁰Kamei Shilo khou katuang pheykai ta, kamei rui aniu pang khou lungcloumei kai ta tei ganclou the.

⁶¹Latdyng Khuk tei, kapumtan khatni kahym gaanhmei ndauhloumei khuk tei zauczihmei nunc rui laa khang nuhlou the.

⁶²Kamei rui kamei nunc ta lunghpuamc the, kumna kaniw ta zauczihmei nunc baeng taek tisw the.

⁶³Nggaanvmei nunc ta rih khou swluai the, tunac nunc micloumei bamv maek khwan the.

⁶⁴Amuh nunc ni buy-baeng mun khou theic the, kaniw now may nunc ta tihuay mak khe.

⁶⁵Nkhamh khou RINGHPOUC kamei zip bammei khou rui thaumei kumc rak pat the; kamei zouh zangvloumei, tanhmeipu kumc pat the.

⁶⁶Kamei rui kata zauczihmei nunc ta alay ganc the; kaniw ta tingsaeng tizaklou the.

⁶⁷Tiki kamei rui Josep kikta ta ganc pat the; kamei Ephraim khwang ta laalou mak khe.

⁶⁸Mi phaan kamei rui Juda khwang ta, kamei nzianmei Zaion chyng ta kadah the.

⁶⁹Khoutei tingkauh thangc kakai kumhmei katuang Ravkai, kamei rui swlou the; kamei rui kandih kumc ntipna swlou the; kamei rui mi ti hei tingsaeng khang swlou the.

⁷⁰Kamei rui kabangc David ta kapah the; lauziubyn khou rui kamei rui kata laa the.

⁷¹Kamei rui kalauziu nunc ta gaengc bammei bamv khou rui kaw guangna kata Isaraelmei guangc, Ravguangc mei nunc ta gaenghmeipu tiswlou the.

⁷²David rui kakhang chak makna, lungh gut changhna kaniw ta gaengclou khwan e, khatni zay chuyna kaniw ta zaylou khwan e.