Read Rongmei Naga KALUMLU 79 Bible Online

KALUMLU 79 - Rongmei Naga bible

KALUMLU 79

¹He Ravguangc, zentelmei nunc rui, nang kandic khou rihkey the, kaniw rui nang tuang nthanmei Ravkai swtanac the, Jerusalem ta sw kasic the.

²Kaniw rui nang mei nunc pumc laengdia taek khang, nang bangc nunc pumc nwmbangc khouringc nunc taek khang ganclou the.

³Kaniw rui nang mei nunc zei dui bun kumc bun key the; zei rui Jerusalem kabamv kathuic dui kumc luangc the, theihmei ta mbeihlou khang meic nsaekclou mak khe.

⁴Bam nkuaymei zaatc nunc rui aniw ta tizak the; kaniw rui aniw ta nuic the khatni sinnui the.

⁵He Ravguangc, nang aniw ta tingsaeng lunghpuamc bam nina cho? Nanglungpuam mai kumc chuangc bam nina cho?

⁶Nanglungpuam hei nang ta kalum makmei zaat nunc, nang khou huayney makmei nunc khou keylou kan o.

⁷Kalam thu kaniw nang mei nunc ta swluai the; kaniw nang kandic ta sw kasic the.

⁸Aniw pupouc nunc paap zaeng rui aniw ta dandi tiilou rio. Aniw ta zauc nzianlou o; aniw tuang machunhmei guay hei maek khe.

⁹Aniw ta nkhavlou o, He Ravguangc; khatni aniw ta kanlou o. Nang zanc khang rui aniw ta gupatlou o, aniw paap guay kuaklou o.

¹⁰Tabui swna zaatc nunc rui, “Nang Racguangc tabui thangc cho?” twna aniw khou thanv bam nina cho? Nang bangc nunc zei tikeyloumei zaeng khang zaatc nunc ta aniw hu khou dandi tiilou o.

¹¹Kangkai khou bammei nunc rui kalanghmei hei nkinglou o, theih khang latzan luailou bammei nunc ta daihmei nang pumtan rui tiduaklou o.

¹²He RINGHPOUC, zaatc baihmei nunc rui nang ta tizak bammei khang hei kadam chanei khwm khangclou o.

¹³Mi khou kiu aniw, nang mei nunc, nang lauziu nunc, nang ta tingsaeng thuancku bam ni, guang nimei ganv guay khou nang ta thuanc ni.