Read Rongmei Naga KALUMLU 80 Bible Online

KALUMLU 80 - Rongmei Naga bible

KALUMLU 80

¹He Isarael ta Gaengcloumeipu; Josep kik ta zayloumeipu, aniw khwan chulou o. Kerubim ruc khou, kaguangc bamvpaeng khou dungc bammeipu,

²nang ta Ephraim, Benjamin, khatni Manase khwang khou lyanlou o. Aniw khou nang ngamv ndauhlou o; guangna aniw ta kanlou o!

³Aniw ta laalou dat ro, he RINGHPOUC! Aniw ta zauc nzianlou o, aniw ta kanlou o!

⁴He RINGHPOUC Ngamparymei Racguangc, nang mei nunc rui huayneymei ta asaanh lunghpuamc bam nina cho?

⁵Nang rui aniw ta zaeng tisilou the, aniw ta tikaplou the.

⁶Aniw daeng khou bam haengv bammei zaat nunc ta nang rui aniw kandic ta ti-adow the; aniw ta zauczihmei nunc rui aniw ta tizak the.

⁷Aniw ta laalou dat ro, he Ngamparymei Racguangc! Aniw ta zauc nzianlou o, kumna aniw ta kanlou o!

⁸Nang rui Izip khou rui drakha bang akhat phungc guang khwan e; nang rui zaatc baihmei ta alay gancna, hei tei kaniw kandic khou lingclou the.

⁹Nang rui hei tei thau nimei bamv sw nthanlou the, hei tei kamaan zangc nthuk key the; hei tei mi kandic kapwm khou baanc pat the.

¹⁰Kasung chyngbut guay guam liam the; kachiang rui daihmei sidar bang guay ta baanc bin the.

¹¹Kachiang Mediteranean duipui baanc tangc the, Euphretis duithuak baanc tangc the.

¹²Mi raengv ti hei nang tabui swna swralou tu cho? Ntaw thu tat ruanloumei kathuic rui mi drakha thai hei houc tu the.

¹³Chabwam nunc rui nii puat the, nwmbangc khouringc nunc mi khou rui kaniw bung tu nggu the.

¹⁴Aniw khou karih guanglou o, he Ngamparymei Racguangc! Aniw ruc khou tingkauh thangc rui zauc keylou o; guangna nang mei nunc ta kanlou o!

¹⁵Nang rui lingcloumei drakha bang ti hei guangna kanlou o. Mi drakha bwan ti hei nang rui heidi tancna tithaulou the!

¹⁶Aniw ta zauczihmei nunc rui mi ti hei mai thoulou the, khatni dow bau key the. Lunghpuamcna kaniw ta zauclou o, kaniw ta swmutlou o!

¹⁷Nang rui kadahloumei mei nunc ti hei, nang rui heidi titancloumei zaat ti hei kanlou o, gaeklou o!

¹⁸Aniw nang khou rui tat pat dat zat lak khe; aniw ta tikaluanlou o, kum e thei aniw nang ta thuanc bam ni.

¹⁹Aniw ta laalou dat ro, he RINGHPOUC. Ngamparymei Racguangc! Aniw ta zauc nzianlou o, kumna aniw ta kanlou o!