Read Rongmei Naga KALUMLU 83 Bible Online

KALUMLU 83 - Rongmei Naga bible

KALUMLU 83

¹He Ravguangc, reih reilou rio; rimh rimlou rio; tazik chikh chiklou rio!

²Zauclo! nang ta zauczihmei nunc adow thau the, nang ta karaengmei nunc kaniw py khuang thau the.

³Nang mei nunc ta sw khang mbincna raengc bam e; nang rui gaek bammei nunc ta sw kasic khang raengc bam e.

⁴Kaniw rui sa e, “Guang o, aniu Isaraelmei zaat ti hei swmaan di kho; Isaraelmei zanc hei ningtow dat mak kan di tho.”

⁵Kaniw tuang raeng khou kaniw chwnchamc the, kumna kaniw nang ta sw khang kariu the:

⁶Edommei lev Isaraelmei, Moabmei lev Hagrimei,

⁷Gebalmei, Ammonmei, Amalekmei, Philistinmei, khatni Turmei kariu the.

⁸Asiriamei ni kazauh the, Lot kikta tuang tanhmei phwam swna kariu the.

⁹Nang rui Midianmei nunc khou, Sisera khatni Jabin khou, Kishon duithuak khou swlou kanmei tei kumcna kaniw khou ni swlou o.

¹⁰Nang rui kaniw ta Endor khou zaw tisilou the, kaniw pumc kandih khou taamclou the.

¹¹Nang rui Oreb lev Zip khou taanclou kanmei tei kumcna kaniw tuang kapy nunc khou taanclou o; nang rui Zeba lev Zalmunna khou taanclou kanmei tei kumcna,

¹²“Ravguangc kandic hei aniu khang laa puni,” twna sa bammei kaniw tuang dihsinpouc nunc ta zaw tisilou o.

¹³He Ravguangc, kaniw ta mbut zin kumc, mpwan rui aliu ganhmei napgung zin kumc kaniw ta zinphaklou o.

¹⁴Ramvpuk khou ramhac kumc, mai bwang rui luanghbut ta kahap kumc,

¹⁵nang tuang pwanzingc rui kaniw ta nthaulou o, nang tuang meicpingmei pwan rui tipinglou o.

¹⁶Kaniw zaw zakmei rui duamliamlou o, he Ravguangc; kaniw khou nang pumtan tithaylou o.

¹⁷Kaniw ta tingsaeng zaw tisilou diu khatni tipinglou diu; kaniw zak kasicna theic kan diu.

¹⁸Nang na hei RINGHPOUC e, kandih kapwm ta sinmeipu e twmei kaniw thay kan diu!