Read Rongmei Naga KALUMLU 86 Bible Online

KALUMLU 86 - Rongmei Naga bible

KALUMLU 86

¹He RINGHPOUC, ai rui samei nkinglouna dawlou o, ai hei ngangv bamv maekmei suanmei e.

²Theic nimei khou rui kanlou o, ai nang biang piu chuy bam de. Ata kanlou o, ai nang bangc e khatni ai nang khou lwmlou e.

³Nang hei aRacguangc e, ata zauc nzianlou o; ai nang khou neihmaryn huayney bam e.

⁴Nang bangc ta tineihlalou o, he Ravguangc; ai nang khou huayney bam e.

⁵Nang hei aniw khang gay e khatni kuaklou thay e, nang khou huayneymei guay ta taek makna nzian bam e.

⁶He RINGHPOUC, ai huayneymei nkinglou o; nkhavlou khang ai kapna huaymei chulou o.

⁷Ryanramei ganv guay khou ai nang ta kaw e, kalam thu ai huayneymei nang chulou bam e.

⁸Nang kumhmei rav baihmei maek ge, he RINGHPOUC; nang rui taancloumei taanv tei meic gaanv khat na sini taanc ngam mak ge.

⁹Nang rui damcloumei zaatc guayna guangna nang khou nkhum key puni; kaniw nang hym thuanc puni.

¹⁰Nang hei tancbauhmei e, khatni charynmei taanv taanhmeipu e; nang na hei Ravguangc e.

¹¹He RINGHPOUC, nang rui ata titaanc niimei tei akhou dinclou o, ai nang lat piu chuyna piu ni; alung kapwm rui nang siamruai sw khang akhou nchamlou o.

¹²Ai alung kapwm rui nang ta thuanc ni, he RINGHPOUC aRacguangc; ai nang hym tingsaeng kauc ndauh ni.

¹³Taek makmei nang ramzian akhou nzianloumei hei adih daic cho! Nang rui ata tarou khou rui kanlou the.

¹⁴Daihriw swmei nunc ata sw khang guang the, he Ravguangc; zauzian thay makmei, nang khou lwmlou makmei nunc rui ata swluai khang karamc the.

¹⁵Tiki nang thu, he RINGHPOUC; zauzian thaymei khatni nzianmei Racguangc e; kaganv thuic khaengv saengc e, zauzian thay e khatni kalat suai zat mak ge.

¹⁶Akhou karih guanglou o, kumna ata zauc nzianlou o; nang bangc akhou nang pumtan tiilou o, nang bangcpui nac mpouh ata kanlou o.

¹⁷Nang rui nzianloumei taanv akhou taanclou o, he RINGHPOUC: ata karaengmei nunc zak puni, nang rui ata ti-amanvlou the khatni nkhavlou the twmei ata karaengmei nunc how pwkhou kaniw zak puni.