Read Rongmei Naga KALUMLU 89 Bible Online

KALUMLU 89 - Rongmei Naga bible

KALUMLU 89

¹ He RINGHPOUC, nang tuang taek makmei ramzian tei ai kaganv kathuic suan bam ni; nang tuang lwmlou nuhmei tei ai tingsaeng kauc ndauh bam ni.

²Nang rui aniw ta tingsaeng nzianlou bam puni twmei ai thay e, nang lwmnuhmei hei tingpuk kumcna tingsaeng de twmei ai thay e.

³Nang rui sa kan the, “Ai rui kadahloumeipule ai latdyng dinglou the; abangc David khou latdyng swlou the.

⁴‘Nang kikta rui kaganv thuic guangh sw puni; nang guangc bamvpaeng tingsaeng ti-ntiplou puni.’ ”

⁵He RINGHPOUC, nang rui taancloumei charynmei taanv guay tei tingpuk rui suan e; nang tuang lwmnuhmei tei kaniw suan e.

⁶Nang kumhmei gaanv khat na sini tingkauh khou maek ge, he RINGHPOUC; tingkauhmei gaanv khat na sini nang ta nchamcmei maek ge.

⁷Nthanmei nunc tuang pei khou nang ta ngamziu sw e; meic kaguayna nang ta pingna ding e.

⁸He RINGHPOUC Ravguangc, Ngamparymeipu, nang kumcna tancbauhmei maek ge. Ramh lam guayna khou nang hei suai zat mak ge, he RINGHPOUC.

⁹Kamuatc bammei duipui ta nang rui sin e; duipui tuang lungpuamhmei muat guay ta nang rui khaam rimlou e.

¹⁰Nang rui ravsic Rahab ta swluaina niak puatlou e; nang tuang tancbauhmei pumtan rui, nang rui nang tuang zauczihmei nunc ta zaw tisilou e.

¹¹Tingkauh hei nang tuang e, kandih hei ni nang tuang e; nang rui mbaanv ta khatni mi khou naimei katana ta damclou e.

¹²Nang rui dihpy dihba damclou e. Tabor Chyng lev Harmon Chyng rui neihlana nang khou suan e.

¹³Nang tik adih daic cho! Nang pumtan adih daic cho!

¹⁴Nang guangcdic hei nchumhmei khatni nzihmei khou kasiamh thau e; nang taanv guay khou nzianmei khatni suai zat makmei lyanlou e.

¹⁵Lu suanna nang ta kalummei nunc tei, nang tuang zauzian riw khou lungc bammei nunc tei adih sangay cho!

¹⁶Nang paan rui neihmaryn neihla e, khatni nang ramgai khang ta kaniw nang ta thuanc e.

¹⁷Nang rui aniw ta ridai mpeyna tingamlou the, nang ramzian paan rui nang rui aniw ta rih tingamlou the.

¹⁸He RINGHPOUC, nang rui aniw ta gaekloumeipu khang kapahlou e; Isarael tuang nthanmeipu, nang rui aniw khang guangh tiilou e.

¹⁹Reynungc ndawman khou, lwmlou nuhmei nunc khou salou e, “Tanc bauhmeipu akhat ta ai nkhavlou kan the; ai rui meic pang khou rui kapahloumeipu khou, ai rui guangh bamvpaeng tiilou kan the.

²⁰Ai rui abangc David khou nthanmei thauc teylouna, kata guangh tiswlou the.

²¹Angamv kakhou nai tanh tan puni, apumtan rui kata titanclou puni.

²²Kata zauczihmei nunc rui kata ngam zat pw lak khe; meicsimei nunc rui kata ngam lak khe.

²³Kata howmumei nunc ta ai rui niak puatlou puni, kata karaengmei kathuic ta swkey puni.

²⁴Ai kata nzian puni khatni kakhou alat suailou zat lak ge; ai rui kata rih tingam tanh tanlou puni.

²⁵Ai rui kaguangcdic Mediteranean duipui khou rui Euphretis duithuak nganv tidaiclou puni.

²⁶‘Nang hei apu e, aRacguangc e; nang hei ata gaekloumeipu khatni kanloumeipu e,’ twna kamei rui akhou sa puni.

²⁷Ai rui kata anac nareimei mpouh, guangh guay khou rui daic liangmeipu tiswlou puni.

²⁸Ai kakhou alatdyng ngaek tanh tan puni, ai lev dingloumei latdyng tingsaeng nai bam puni.

²⁹Kakaikhwang hei tingpuk nai saanv nai bam puni; kakikta rui guangh sw tanh tan puni.

³⁰“Tiki katou kanac nunc rui alatdanv piu mak ge thei, alatdyn guay thei layna lungh mak ge thei,

³¹alatdanv ta kaniw ning nthuk mak ge thei, alatdanv guay piu mak ge thei,

³²kaniw paap guay khang ai rui kaniw ta dandi tii puni; kaniw khuay guay khang ai rui kaniw ta tiryanra puni.

³³Tiki ai David ta nzian taan lak ge, khatni kakhou alatdyng suai lak ge.

³⁴Ai kakhou dingloumei latdyng swbak lak ge, kakhou swloumei latdyng akhat na sini kak lak ge.

³⁵“Nthanmei azanc khou tingsaeng khang ai rui latdyng sw e; Ai David khou saraamc zat lak ge.

³⁶Neihriw nai bam saanv kakikta nai tanh tan puni. Ai rui kaguangcdic ta zauc bam puni,

³⁷kaguangcdic hei bw kumc tingsaeng nai bam puni, tingpuk nai bam saanv mi hei ntipna ding bam puni.”

³⁸Tiki nang rui thauh teyloumei guangc ta nang lungpuamc the; nang rui kata ganclou the khatni ganc patlou the.

³⁹Nang bangc khou swloumei latdyng tei nang swbak the khatni kaguangc pyrun mbut ding khou ganc keylou the.

⁴⁰Nang rui kakaidai raengv swra the, katuang rihgaekkai guay swra ngamna ganclou the.

⁴¹Tat ruanloumei guay rui katuang asut the; kakai kainingmei guay rui kata nuic the.

⁴²Nang rui kata zauczihmei nunc ta rih tingamlou the; nang rui kaniw guay ta tineihlalou the.

⁴³Nang rui katuang baengsaeng ti-mbwanglou the, kumna kata rih bamv khou zaw tisilou the.

⁴⁴Katuang guangh builwang nang rui laa ganc the. kaguangc bamvpaeng kandih khou ganc keylou the.

⁴⁵Nang rui kata kakwm kaganv tangh makna chabwan panty tiduilou the, zakmei rui kata duam bin the.

⁴⁶He RINGHPOUC, nang tingsaeng nkamh bam nina cho? Asaanh tingsaengcna nang lungpuam mai kumc chuangc bam nina cho?

⁴⁷Apanty hei adih dui cho ningtowlou o; nang rui aniw guayna ta theic nimei swna damclou e twmei ningtowlou o!

⁴⁸Thow tei theic zat makna ringc bam puni cho? Thow rui theihmei khou rui duak pat ngam nina cho?

⁴⁹He RINGHPOUC, nang tuang reynungc ramzian tei tabui thangc cho? Nang rui David khou swloumei latdyng guay tei tabui thangc tat kan thena cho?

⁵⁰Nang bangc ata akumhna tizak bam cho twmei amuclou rio, ravmaengc kalummei nunc rui ata siang bammei ai akhangv bammei amuclou rio.

⁵¹Nang rui thauh teyloumei guangc ta nang ta zauczihmei nunc rui tizak the, he RINGHPOUC! Kamei tatloupui bamv kathuic, kaniw rui kata tizak the.

⁵²RINGHPOUC ta tingsaeng thuanc o! Amen! Amen!