Read Rongmei Naga KALUMLU 9 Bible Online

KALUMLU 9 - Rongmei Naga bible

KALUMLU 9

¹He RINGHPOUC, nang ta thuanc ni, alung kapwm rui thuanc ni, nang rui taancloumei charynmei taanv guay ta tei ai rac ni.

²He Ngamparymei Racguangc, ai neihlana suan ni, nang paan rui nang ta thuancna suan ni.

³Nang guang pwkhou ata zauczihmei nunc pak kan the, kaniw bow keyna theic kan the.

⁴Nang rui nchumhna kalingmei latzan sw the; nang rui akhang latzan swlou the.

⁵zentelmei nunc ta nang rui luh kan the, meicsimei nunc ta nang rui swmaan kan the; kaniw ta ningtow dat lak khe.

⁶Aniw ta zauczihmei nunc ta tingsaeng khang swmaanlou kan the; nang rui kaniw kaidai guay swmaan kan the, mi guay ta tei ningtow dat lak khe.

⁷Tiki RINGHPOUC thu tingsaeng guangc e; latzan sw khang kaguangc bamvpaeng kasiamh thau kan the.

⁸Kamei rui kandih ta nchumhna sin the; kamei rui zaatc guay ta nchumhna latzan sw the.

⁹RINGHPOUC hei rairiu khaengvmei nunc khang duploupui bamv e, ryanrapui ganv guay khou duppui bamv e.

¹⁰He RINGHPOUC, nang ta thaymei guay nang khou lwm puni; nang khou guangmei gaanv khat na ta sini nang ganc pat mak ge.

¹¹RINGHPOUC ta thuancna suan o, Zaion khou guanghtu bammeipu ta thuanc o! Kamei rui taancloumei tei zaatc kathuic khou dinc ndauh o!

¹²Ryanra khaengv bammei nunc ta Ravguangc thay e; kaniw rui kapna huaymei ta kamei amuc mak ge; khatni kaniw khou sina swloumei nunc ta kamei rui dandi tii e.

¹³He RINGHPOUC, ata zauc-nzianlou o! Ata zauczihmei nunc rui tiryanra bammei ramrianra hei zauclou o! He RINGHPOUC, ata theic nimei khou rui kanduaklou o;

¹⁴ai Jerusalemmei nunc mav khou dingna, ai rui nang ta thuanc bammei lam guay hei kaniw khou dinc ndauh ngam khang kanlou o. Ai neihla ni, kalam thu nang rui ata kanlou the.

¹⁵Zentelmei nunc tei kaniw rana kaniw kwam khou keylou kan the; kaniw rana kaniw phac khou manc kan the.

¹⁶RINGHPOUC katuang nchumhmei latzan rui kaniw ta ndauhlou the, khatni meicsimei nunc kaniw rana kaniw phac khou manc kan the.

¹⁷Meicsimei guay, Ravguangc ta ganc patmei guay tuang nganvlou nimei thu theihmei e.

¹⁸Lungcthuy lakmei ta ntaamvna amuclou tanh tan lak ge; lungcsimei nunc tadiuc tiguang tangclou puni.

¹⁹He RINGHPOUC, guanglou o! Maansei rui nang ta ngam mak kan diu! Zentelmei nunc ta nang mav khou khuam guangna, kaniw ta latzan swlou o.

²⁰He RINGHPOUC, kaniw ta tipinglou o; kaniw hei theic nimei maansei dyng e twmei kaniw ta tithaylou o.