Read Rongmei Naga KALUMLU 90 Bible Online

KALUMLU 90 - Rongmei Naga bible

KALUMLU 90

¹He RINGHPOUC, nang hei meickin kathuic aniw kai sw tanh tan guang the.

²Nang rui chyngbut guay damclou mak khou rui, kandih tinai mak khou rui, nang hei tingsaeng Ravguangc e, khatni tingsaeng Ravguangc sw bam puni.

³Nang rui maansei ta kandih khou hanc dat khang latdanv pat the; nang rui kata taniang tiguanhlou dat the.

⁴Tingkwm ching khat hei nang khang neih khat kumh tuang de; mi guay tei tat kanmei doulaneic na kumh tuang de, zingbangc dui kanmei ganv dak na kumh tuang de.

⁵Nang rui aniw ta phiak ganc the; aniw hei mang na kumh tuang de.

⁶Aniw hei lauthwan buan thauna daic thauna, kapwang puangcna, tingzyn kangc keyna theic kanmei pucbwan na kumh tuang de.

⁷Nang lungpuam rui aniw ta swmutlou the; nang lungpuam dai rui aniw ta tiping the.

⁸Nang rui aniw paap guay nang mav khou lou the, aniw tuang nkamhmei paap guay nang how bam e.

⁹Nang lungpuam rui aniw panty dandui the; asuaicna samei lat kuma aniw panty maan kan the.

¹⁰Aniw panty hei pumh gaymei rui tingkwm 70 na de — 80 ni lungc e; tiki mi hei taanc ruaicna ryanra lakmei panty de. Panty hei katumcna luai the, kumna aniw panty hei samh kumc tat the.

¹¹Thow rui nang lungpuam ti hei thay tangc thena cho? Nang reic thaumei hei adih meicpingmei tuang cho twmei thow thay tangc thena cho?

¹²Aniw ningting pat khang, aniw panty hei adih dui cho twmei dinclou o.

¹³Asaanh aniw ta nang lungpuamc bam nina cho? Nang bangc aniw ta zauc-nzianlou o, he RINGHPOUC!

¹⁴Aniw lu suanna panty saanvsaengh neihla bam khang, nang tuang taek makmei ramzian rui aniw ta lauthwan kathuic tipadiklou o.

¹⁵Aniw ryanramei ganv khou tei nang rui aniw khou lungh ryanramei tiilou kanmei zu tei neihlamei ntaw aniw khou tiilou o.

¹⁶Nang bangc aniw khou nang tuang taanvdaih lyanlou o; aniw tou nac nunc khou nang pumtan tihowlou o.

¹⁷He Ravguangc, aniw ta suaihiamlou o. Aniw taanv guay kathai ti-nthailou o!